السی ویل و خواری تے اولیت نا بنداو آ ایسر کننگ کن گام گیج نا گرج ءِ اسسٹنٹ کمشنر لورالائی ندیم اکرم
انتظامیہ الس نا ویل آتے اوفتا درگہ غا ایسر کننگ و بنداوی آسراتی تا فراوانی کن دوئی وسیلہ غاتے کاریم اٹ اتنگ ءِ
Get real time updates directly on you device, subscribe now.
اسسٹنٹ کمشنر لورالائی ندیم اکرم نا کماشی ٹی اسسٹنٹ کمشنر کمپلیکس اٹی السی غاو دیوان اڈ ہلک، ہرا نا مسخت شاری تا ویل، غاو و سلاہ تے دراست بننگ و اوفتا دمدستی ایسری کن عملی گام گیج کننگ ئس۔ دا غاو دیوان اٹی ایف سی نا میجر کامران، ایس ڈی پی او غلام اکبر، تحصیلدار بوری ثناء اللہ لونی، جتا جتا سرکاری محکمہ غاتا افسر و نمائندہ، انجمن تاجران نا عہدیدار، قبائلی متبر، سول سوسائٹی نا نمائندہ و ایلو تعلقدار کمامدار آک بشخ ہلکر۔دا وخت آ قبائلی متبر، پوریاگر و شاری تپہ غاک تینا ویل و غاو تے مون آتخار، ہرافتے تعلقدار محکمہ غاتا افسر آک خوڑتی اٹ نوٹ کریر۔ شریدار آک خاص وڑ اٹ بجلی، دیر انا تنکی‘ کسر تا خرابی‘ امن و ایمنی‘ سَفائی‘ سیوریج نا دیر انا کشنگ بنداوی شاری آسراتی و BSDI نا رِد اٹ برجا شونداری ڈٹ آتتون اوار ایلو السی ویل آتا نشاندہی کریر۔ شاریک اسسٹنٹ کمشنر ءِ تینا علاقہ غاتیٹی مون تروک ویل آتیان معلومدار خواست کریر کہ بنداوی آسراتی تا فراوانی و برجا شونداری ڈٹ آتا وخت آ پوروی ءِ پک کننگے۔ داوخت آ گڑاس ویل آتا دمدستی ایسری کن تعلقدار افسر آتے جاگہ غا پارت کننگا۔ اسسٹنٹ کمشنر ندیم اکرم تعلقدار محکمہ غاتا افسر آتے پارت کرے کہ غاو دیوان اٹی مون تروک السی ویل و غاو تے اولیت نا بنداو آ ایسر کننگے، و ہرا باندات نا تعلقداری ایلو محکمہ غاتیٹی ءِ اوفتتون رابطہ کرسا پیش رفت ءِ پک کننگے۔ او پیدوار کرے کہ السی ویل آتا ایسری ٹیہچ ءُ وڑ اسے نا ڈیوالئی یا ہُرے سگنگ مفک۔ او پارے کہ ضلعی انتظامیہ الس ءِ اوفتا درگہ بنداوی آسراتی تا فراوانی و ویل آتا دمدستی ایسری کن کل ساڑی وسیلہ غاتے کاریم اٹ اتنگ اٹی ءِ۔ غاو دیوان نا بنداوی مسخت انتظامیہ و الس نا نیام اٹی رابطہ غاتے پین سوگو کننگ و شاری تے تینا غاو تے دراست تعلقدار کمامدار آتسکان رسیفنگ نا اسہ بھرمی ءُ پلیٹ فارم اس فراوان کننگ ءِ۔ اسسٹنٹ کمشنر شاری تیا ہم زور شاغا کہ او تینا ویل و غاو تا ایسری کن انتظامیہ تون دراست رابطہ ٹی مریر و علاقہ ٹی امن و ایمنی‘ سَفائی و سرکاری شونداری ڈٹ آتا جوانی کن ضلعی انتظامیہ تون کمک کیر۔ غاو دیوان نا اخیر اٹ اسسٹنٹ کمشنر ندیم اکرم باور کرفے کہ شاری تا کنڈ آن پیش کروک ویل آتیا پیش رفت نا جم جاچ ہلنگک و تعلقدار محکمہ غاتیان رپورٹ بٹنگسا السی غاو تا ایسری ءِ پک کننگک۔،لورالائی (میر محمد بلوچ)