وزیر اعلیٰ بلوچستان تون پنی آ گلوکار عارف بگٹی نا اورڈہی

کوئٹہ، وزیراعلیٰ بلوچستان میر سرفراز بگٹی تون دوشنبے نا دے پنی آ لوک گلوکار و فنکار عارف بگٹی اوڑدہی کرے، ہراٹی بلوچستان نا لوک ثقافت، موسیقی و کرن آتیا تالان لوک داستان پوسکنوڑ اٹ ورنا چین اسکان سر کننگ نا بابت جم گپ وتران کننگا۔ داوخت آ وزیراعلیٰ میر سرفراز بگٹی لوک داستان “سمل” آ تفوک آ گیت ءِ پوسکن و یکتا وڑ اٹ پیش کننگ آ گلوکار عارف بگٹی نا گچین آ جہد انا سفت ءِ کرے۔ او پارے کہ بلوچستان نا ربیدہ‘ روایت و لوک داستانک و موسیقی صوبہ نا تاریخی و ربیدہ ئی تشخص نا اہم ءُ بشخ اسے ءُ، ہرافتے پوسکنوڑ گرج آتتون ہمگرنچ کرسا مثبت وڑ اٹ دنیا نا مونا پاش کننگ نا گرج ءِ۔ وزیراعلیٰ پارے کہ بلوچستان نا فنکار و گلوکار تینا تخلیقی لائخی تا کمک اٹ صوبہ نا امیر آ ربیدہ و روایت آتے گچین وڑ اٹ مونی دننگ انگ ءِ‘ لوک داستان تے پوسکنوڑ موسیقی نا کمک اٹ ورنا چین اسکان سر کننگ اسہ ستا کڑزوک گام اسے ہراڑان طالب علم آتے تینا ربیدہ ئی میرات تون پین گنڈنگ مریک۔