طالب علم آتا تعلیمی آب ءِ پین بڑزا کننگ کن باقاعدہ چاروکی ءِ پک کروئی ءِ،ملک مقبول احمد

پنجگور نا اہم انگا تعلیمی درسگاہ گورنمنٹ بوائز ماڈل ہائی اسکول پنجگور اٹی پوسکن آ تعلیمی عزم اتون اوار تعلیمی سیشن نا بابت اولیکو باقاعدہ اسٹاف دیوان پرنسپل ملک مقبول احمد نا کماشی ٹی اڈ ہلک، ہراٹی اسکول نا کل تدریسی و غیر تدریسی کارندہ غاک بھلو کچ اسے ٹی بشخ ہلکر۔ دیوان نا باقاعدہ بنا تلاوتِ کلامِ پاک آن مس، ہراڑان پد پرنسپل کل شریدار آتے بخیر کرے و ادارہ نا تعلیمی و انتظامی جوانی کن تین پہ تینی سلابت‘ ٹیم ورک و زمواری نا جوزہ ءِ بنداوی اولیت گوندا۔ دیوان اٹی اسکول ءِ مون تروک جتا جتا تعلیمی, انتظامی و بنداوی ویل آتا جم جاچ ءِ ہلنگا۔ خاص وڑ اٹ تدریسی کارندہ غاتا کمتی‘ غیر تدریسی اسٹاف نا کمتی‘ اسکول بس سروس نا بنا، طالب علم آتا تعلیمی آب و کارکڑد نا جاچ، ہم نصابی سرجز آتا باقاعدہ بنا‘ اسکول ہاسٹل ءِ مون تروک ویل و ایلو اہم باندات آتیا جم سجفنگا۔ شریدار آک دا ہیت آ امنا کریر کہ طالب علم آتا تعلیمی آب ءِ پین جوان کننگ کن باقاعدہ چاروکی‘ تدریسی ڈٹ بندی، طالب علم آتا کارکڑد نا پدریسہ جاچ و استاد آتا تین پہ تینی سلاہ ءِ گچین کننگک۔ ہندا وڑ طالب علم آتا ذہنی، جسمانی و تخلیقی لائخی تے تالان کننگ کن ہم نصابی سرجز، گوازی‘ شرہ‘ ترانکاری گو و ا یلو مثبت سرجز آتا اڈ تننگ آ خاص چکار تننگ نا عزم کننگا۔ دیوان اٹی اسکول اٹی برجا تفوئی کاریم تا ہم جاچ ہلنگا۔ شریدار آک منہ تفوئی کاریم تا آب آ است جم مفننگ نا درشانی ءِ کرسا پاریر کہ سرکاری وسیلہ غاک الس و طالب علم آتا آسودگی و فلاح کن امانت ءُ، ہندا سوب آن اوفتا شفاف، بھرمی و آب اٹ کاریم اٹ اتنگ ءِ امر کہ مر پک کروئی مریک‘ ہیبدار و نزور آب تفوئی کاریمک نئے بیرہ ادارہ نا گرج آتے پورو کننگ اٹ بے سہب مریرہ بلکن قومی وسیلہ غاتا زیان نا سوب ہم مریرہ۔ دا بابت آب، شفافیت و زمواری ءِ پک کننگ نا گرج آ زور شاغنگا۔گڈسر اٹی پرنسپل ملک مقبول احمد دا عزم انا درشانی ءِ کرے کہ گورنمنٹ بوائز ماڈل ہائی اسکول پنجگور ءِ پین فعال، منظم و آب اٹو تعلیمی ادارہ اس جوڑ کننگ کن کل اسٹاف نا اواری اٹ بھرمی گام گیج کننگک۔ او استاد آتیا زور شاغا کہ او تینا کسبی زمواری تے پورو وڑ اٹ زمواری‘ است انا سِخت و استخواہی اٹ پورو کیر تانکہ طالب علم آتے جوان ءُ تعلیمی چاگڑد فراوان کننگ مرے۔ دیوان اسہ مثبت، تعمیری و تین پہ تینی پت انا حالیت اٹ ایسر مس، وخت اس کہ کل شریدار آک ادارہ نا جوانی، طالب علم آتا جوان آخبت و تعلیمی آب اٹی پین گچینی کن اسیجائی جہد ءِ برجا تخنگ نا عزم کریر۔ پنجگور (نامہ نگار)