جماعتِ اسلامی نا 12 ربیع الاول آن پد مچ آ ملک اٹ ہڑتال نا پڑو

لاہور، امیر جماعت اسلامی پاکستان حافظ نعیم الرحمن پیٹرولیم لیوی نا باندات آ 12 ربیع الاول آن پد مچ آ ملک اٹی شٹر ڈاؤن ہڑتال نا پڑو کرے۔ لاہور اٹی پریس کانفرنس کرسا حافظ نعیم الرحمن پارے کہ ننا جہد جوان وڑ اٹ مونی ہننگ اٹی ءِ‘ حکومت ءِ پیٹرولیم نا نہاد اٹی کمتی کروئی تمک۔ او پارے کہ نت مافیا و شکر مافیا نا ساڑی گری ٹی ملک شون ہلنگ کپک‘ الس پیش تما ننا جہد انا بشخ جوڑ مرے۔ کشارگر آتے اڑزان کھد رسینپک‘ ننا جند نا زر آن سرکاری افسر آک بھلا بھلا گاڈی تے ٹی پیری کیرہ‘ امیر جماعت اسلامی پارے کہ 12 ربیع الاول آن پد مچ آ ملک اٹی ہڑتال کینہ، داسہ مذاکرات دُن مفک کہ نی پا دھرنا ءِ چٹفبو و نن امنا کین‘ دھرنا ہمو وخت آ چٹک ہراتم حکومت ننا خواست آتے عملی وڑ اٹ پورو کیک۔حافظ نعیم الرحمن مستی پارے کہ لیوی بھتہ ہچ ءُ وڑ اسے ٹی سگنگ مفک‘ حکومت ءِ پیٹرول نا نہاد ءِ کم کروئی تمک‘ اگہ ننا خواست آک پورو متوس تو نن اسلام آباد نا کنڈ آ مارچ کینہ، او ننے توننگ کپک، ننا اسہ کارندہ اس ہم قربانی تننگ آن پدی مفک۔ یات سلے کہ جماعت اسلامی پیٹرولیم لیوی نا برخلاف مچ آ ملک اٹی گورنر ہاؤس تا پیشن آ دھرنا تسنے ہرادے یک شنبے نا دے ارٹمیکو دے مس۔