لورالائی‘ ایڈیشنل ڈپٹی کمشنر جنرل علی نواز جمالی نا کماشی ٹی ودیکاری تا توننگ کمیٹی نا دیوان

لورالائی، لورالائی ٹی ایڈیشنل ڈپٹی کمشنر جنرل علی نواز جمالی نا کماشی ٹی ودیکاری تا توننگ کمیٹی نا اہم ءُ دیوان اس اڈ ہلک، ہراٹی مچ آ ضلع ٹی سرکاری ڈغار، شاہراہ، کسر، بازار و ایلو السی ہند آتیا جوڑ کانود آن چَپ ودیکاری تا برخلاف برجا کارروائی تا جم جاچ ءِ ہلنگا۔ دیوان اٹی ودیکاری تا چٹفنگ، الس ءِ مون تروک خواری تا ایسری و سرکاری میرات آتا رکھ اکن جتا جتا باندات آتیا جم سجفنگا۔ دیوان اٹی تعلقدار محکمہ غاتا ضلعی افسر آک ضلع ٹی ودیکاری تا ساڑی حالیت، نشاندہی کروک ہند و داسکان مروک کارروائی تا بابت کمیٹی ءِ بریفنگ تسر۔ دا وخت آ دا ہیت آ زور شاغنگا کہ سرکاری ڈغار، کسر تا رئی‘ فٹ پاتھ، بازار و ایلو السی ہند آتیا تفوئی ودیکاری و کوزہ غاتا سوب آن نئے بیرہ ٹریفک نا روانی زہمی مریک بلکن شاری تے ہن وبر اٹی ہم سخت خواری مون تروئی تمک۔دیوان اٹی تعلقدار کمامدار آتے پارت کننگا کہ کانود آن چَپ ودیکاری تا برخلاف بے فرق آن کانودی و بھرمی کارروائی ءِ پک کننگے و کانود نا رِداٹ گام گیج کننگے۔