امریکہ جوہری جلہوکرے تو ہندا وڑ انا ورندی اس تننگک تے،باقر قالیباف

تہران، ترک میڈیا نا رِداٹ ایرانی حوالکاری ادارہ تون ہیت وگپ کرسا ایرانی پارلیمنٹ نا قومی سلامتی و خارجہ پالیسی کمیٹی نا باسک فدا حسین مالکی ایران آ امریکی جوہری جلہو نا گمان آ میڈیا رپورٹ آ ردِ عمل ترسا پارے کہ اگہ امریکہ ایران نا برخلاف جوہری سلہہ کاریم اٹ اتنگا تو ایران ہم ہندا وڑ انا ورندی اس ایتک۔ اونا دا بیان اسہ میڈیا رپورٹ نا حوالہ اٹ مون آ بس ہراٹی امریکہ نا کنڈ آن گمانی جوہری جلہو نا ہیت کننگاسس۔ ہراتم اوڑان سوج کننگا کہ او ایران آ امریکی جوہری جلہو نا گمان ءِ اخس سنجیدہ تکک تو او پارے کہ ٹرمپ نا کنڈ آن بے عقلی نا گام گمان آن پیشن اف، ولے اودے لگپک کہ او دن کننگ نا جیرت کرو انتئے کہ دا وڑ انا گام دنیا ءِ اسہ خطرناک ءُ جنگ اسے ٹی بٹنگ کیک۔ اگہ دا وڑ انا گام اس ہرفنگا تو ایران ہم ورندی ایتک و اونا ردِ عمل ایران نا برخلاف کاریم اٹ اتنگوک آ سلہہ نا وڑانا وڑ اٹ مریک۔ ہراتم سلہہ نا وڑ انا بابت پیدوار کننگ نا خواست کننگا تو او پارے کہ امریکہ ہرا گڑاءِ ہم کاریم اٹ ایس ایران اونا ورندی ءِ ایتک۔ ولے او پیدوار وڑ اٹ دا پاتو کہ ایران تون جوہری سلہہ ارے۔ فدا حسین مالکی مستی پارے کہ تانکہ امریکہ تینا مستین نا کروک آ قول آتیا عمل کپک، ایران مذاکرات نا میز آ پدی بفک، ایلو کنڈآ آبنائے ہرمز تون اوار کیہی باندات آک ایسر کن ہُروک مریرہ۔ ایلو کنڈ آ ایران آبنائے ہرمز ملنگ کن امریکہ نا مون آ خواست تخا۔ امریکی حوالکاری ادارہ سی این این نا رِداٹ دا لڑ ءِ ایرانی پارلیمنٹ نا اسپیکر و بنجائی مذاکرات کار باقر قالیباف امریکہ ءِ تسنے باقر قالیباف امریکہ غان اسلام آباد مفاہمتی یادداشت نا ٹِک آتیا پورو عملدرآمد نا خواست کرے ہرا نا مد اِرا دے مست ایسر مسنے۔ ایرانی اسپیکر پارے کہ واشنگٹن ءِ ڈیہہ اٹ بحری ناکہ بندی و ایرانی تیل آ خلوک کل رکھ آتے دمدستی چٹفوئی مریک‘ وخت اس کہ امریکہ ٹی توروک ایرانی میرات آتے ہم بے شڑت آن بحال کروئی تمک۔ باقر قالیباف ملک انا حالیت آتیاہیت وگپ کرسا خبردار کرے کہ ملک انا تہٹی بے چیٹی و اختلاف ملک ءِ نزور کننگ تون اوار اوار پیشن نا دشمن تے ایران نا برخلاف گام ہرفنگ نا سلہ خلیک۔ او ایرانی الس آ زور شاغا کہ دشمن ملک اٹی بے امنی و نزور کننگ نا پد اٹی ءِ‘ ہندا سوب آن کل پیشن نا سازش آتے بے سہب کننگ کن قومی یکجہتی و سیوت ءِ برجا تخنگ المی ءِ۔ یات سلے کہ مفاہمتی یادداشت نا رِداٹ امریکہ و ایران، لبنان تون اوار ہر پڑ آ فوجی کارروائی تے توننگ آ امنا کریسر وخت اس کہ ایران ایٹمی سلہہ دوئی کننگ یا ٹہیفنگ نا حق آن دزکش مسوسس۔ داکان بیدس امریکہ ایرانی بحری ناکہ بندی ءِ چٹفنگ و ایران آبنائے ہرمز ءِ ملنگ آ امنا کریسس۔