آل بلوچستان گورنمنٹ کنٹریکٹرز فنڈ آتالیپس مننگ نا مذمت ءِ کیک،میر عبدالسلام لانگو

آل بلوچستان گورنمنٹ کنٹریکٹرز ایسوسی ایشن نا عہدیدار آتا اسہ اہم ءُ دیوان اس صدر میر عبدالسلام لانگو نا کماشی ٹی اڈ ہلک۔ دیوان اٹ کوئٹہ ٹی ساڑی صوبائی عہدیدار و ٹھیکیدارآک بھلو کچ اسے ٹی بشخ ہلکر۔ دیوان اٹ ٹھیکیدار آتے مون تروک ویل، پوسکن آ مالی سال انا بجٹ اٹ آن گوئنگ اسکیم تیکن کم فنڈ جتا کننگ، 30 جنوری 2026ء آ جاری مروک زر رشوت تفننگ آ لیپس کننگ تون اوار و ایلو باندات آتیا گپ وتران کننگا و اہم فیصلہ کننگا۔ دیوان اٹ مروک آ فیصلہ غاتا پڑو ءِ بروک آ اِرا، مسہ دے اٹی باقاعدہ پریس کانفرنس اٹی کننگک۔ دیوان آن تران کرسا میر عبدالسلام لانگو، صلاح الدین کبزئی و ایلوفک پاریر کہ محکمہ خزانہ حکومت بلوچستان 30 جنوری 2026ء آ پورو مروک آ اسہ ڈٹ اسے کن 1 کروڑ 32 لکھ روپئی نا زر ریلیز کرے ہراڑکن ٹھیکیدار آن رشوت خواہنگا ہرا تفننگ آ 30 جون آ فنڈز لیپس کننگار ہرانا آل بلوچستان گورنمنٹ کنٹریکٹرز ایسوسی ایشن سخت انگا لوز آتیٹی مذمت ءِ کیک۔ او پاریر کہ ننے ارمان ءِ کہ ایگزیکٹو انجینئر عبدالغفار مندوخیل نا برخلاف دا بھلا دوبہ غاتیان پد ہم محکمہ سی اینڈ ڈبلیو نا کنڈآن داسکان ہچ ءُ گچین کارروائی اس مون آ بتنے، داسہ نن باقاعدہ وڑاٹ چیف سیکرٹری بلوچستان ءِ تینا غاو و کل تعلقدار راستکی تا بابت معلومدار کینہ و اومیت کینہ کہ چیف سیکرٹری بلوچستان دا باندات اٹی ننا راہشونی و داد رسی ءِ کیک۔ او پاریر کہ آل بلوچستان گورنمنٹ کنٹریکٹرز ایسوسی ایشن پیدوار کننگ خواہک کہ اگہ محکمہ نا کہول آ ننا غاوتے چٹفنگتو تو نن کانودی حق ءِ کاریم اٹ اتسا تعلقدار عدالتِ آ کانہ و ایگزیکٹو انجینئر عبدالغفار مندوخیل ءِ کانودی نوٹس نا کمک اٹ تینا موقف و کیس انا بابت معلومدار کینہ، ننا مسخت بندغ اسے بے شاہدی آن بدنام کننگ اف بلکن دوبہ غاتا شفاف، کنڈہلپروک جاست وپاست نا خواست کننگ ءِ۔ او پاریر کہ بلوچستان مہالو آن امن و ایمنی نا ویل، نیزگاری و بنداوی آسراتی تا کمتی نا گواچی ءِ، صوبہ نا الس دیر، بجلی، جان جوڑی، تعلیم و ایلو بنداوی آسراتی تیکن سکنگ ءِ، دا وڑ انا حالیت آتیٹی اگہ السی راجی آسودہی کن جتا کروک سرکاری فنڈ پاننگوک ڈیوالئی، وڈی خوری یا انتظامی اڑاند نا سوب آن لیپس مریر تو دا نئے بیرہ قومی خزانہ نا نسخان ءِ بلکن بلوچستان نا الس تون ہم بے انصافی آنبار ءِ۔ او پاریر کہ آل بلوچستان گورنمنٹ کنٹریکٹرز ایسوسی ایشن وزیراعلیٰ بلوچستان میر سرفراز بگٹی، چیف سیکرٹری بلوچستان شکیل قادر، چیف جسٹس بلوچستان ہائیکورٹ، محکمہ سی اینڈ ڈبلیو و اینٹی کرپشن آن خواست کیک کہ او رشوت تفننگ آ فنڈ لیپس کننگ نا بڑزکو کہولی جاست وپاست کرفیر و ڈیوالئی کروک مرتکب افسر و کارندہ غاتا برخلاف کانودی کارروائی کننگے، نہ تو آل بلوچستان گورنمنٹ کنٹریکٹر ایسوسی ایشن سخت برانز کننگ آ بیوس مریک۔