زیارت و بسیمہ ٹی سیکورٹی فورس آتا کارروائی، 6 دہشت گرد خلنگار،آئی ایس پی آر

سیکورٹی فورس آتا بلوچستان اٹی فتنہ الہندستان نا دہشت گرد آتا برخلاف کارروائی برجاءِ، سیکورٹی فورس آتا بلوچستان نا علاقہ کلی زائیک اٹی انٹیلی جنس بیسڈ آپریشن اٹی 2 دہشت گرد دوزخی مسر۔ سیکورٹی حوالی نا رداٹ بسیمہ کیمپ آن 12 کلومیٹر قطب اٹی کلی زائیک و کاغلی نا نیام اٹ دہشت گرد آتا ساڑی مننگ نا حوال آ کارروائی کننگا۔ سیکورٹی فورس آتتون سم کاری اٹ 2 دہشت گرد دوزخی و 3 ٹھپی مسر، خلنگوک دہشت گرد ءِ مشتاق احمد عرف کوہ یار نا پن اٹ درست کننگا دہشت گرد آتیان ایمونیشن، میگزین، دستی بمب و آئی ای ڈی جوڑ کننگ نا گڑا دوئی مس۔ سیکورٹی حوالی پارینے کہ سیکورٹی فورس آک دہشت گردی نا پورو چٹفنگ و بلوچستان اٹی مدامگی امن اسکان بے سلنگ آن تینا کارروائی تے برجاتخنگ نا عزم آ سلوک ءُ۔بنجائی وزیر مواصلات عبدالعلیم خان بلوچستان نا علاقہ کلی زائیک اٹ انٹیلی جنس بیسڈ سرسہب آپریشن آ سیکورٹی فورس آتے خراجِ تحسین پیش کرینے، اسہ بیان اسے ٹی بنجائی وزیر پارے کہ کلی زائیک اٹ فتنہ ہندوستان نا دہشت گرد آتا برخلاف سرسہب آپریشن ننا فورس آتا بڑزکو لائخی تا درشانی ءِ ہرافک وخت آ کارروائی کرسا دہشت گرد آتا پراگندہ اِرادہ غاتے مش تا کرسا ملک ءِ بھلو نسخان اسے آن بچفیر۔ عبدالعلیم خان پارے کہ بلوچستان اٹ امن و ایمنی نا بحالی کن سیکورٹی ادارہ غاتا قربانیک مچ آ قوم اکن گمرنا سوب ءُ۔ او دا عزم انا درشانی ءِ کرے کہ فتنہ الہندوستان نا کل سلیپر سیل و دہشت گرد آتا پورو چٹفنگ اسکان سیکورٹی فورس آتا کارروائی پورو واک اٹ برجاسلک۔داکان بیدس زیارت و ہرنائی نا سیمی مشانی علاقہ ٹی سیکورٹی فورس آک اودیم حوال نا بنداو آ کارروائی کرسا 4 دہشت گرد آتے کسفیر۔ سیکورٹی حوالی تا رِد اٹ علاقہ ٹی دہشت گرد آتا ساڑی گری نا حوال آ سیکورٹی فورس آک انٹیلی جنس بیسڈ آپریشن کریر۔ مانیٹرنگ نا وخت آ اسہ خالی ءُ اُرا سے ٹی 3 آن 4 دہشت گرد آتا ساڑی گری پک مس۔ پک حوال رسینگ آ سیکورٹی فورس آک دہشت گرد آتا ہند ءِ گھیڑ کرسا بھرمی کارروائی کریر‘ ہرانا سوب آن 4 دہشت گرد خلنگار۔ سیکورٹی حوالی تا رِد اٹ کارروائی آن پد علاقہ ٹی سرچ و سینیٹائزیشن آپریشن برجا ءِ‘ وخت اس کہ دہشت گرد آتا برخلاف کارروائی تے ہم برجا تخنگانے۔