ن لیگ آزاد کشمیر اٹی تینا گیشتری نا کمک اٹ حکومت جوڑ کیک،راناثناء اللہ

وزیراعظم نا سلاہکار و مسلم لیگ (ن) نا راہشون رانا ثناء اللہ خان پارینے کہ آزاد کشمیر گچین کاری تے ٹی مسلم لیگ (ن) ءِ پیدوار گیشتری رسینگا‘ مخصوص نشست و پونچھ ڈویژن اٹی گچین کاری تیان پد ننا ارا تہائی گیشتری رسینگ نا اومیت ارے۔ننا جماعت آزاد کشمیر اٹی تینا گیشتری نا کمک اٹ حکومت جوڑ کیک‘ آزاد کشمیر نا الس نواز شریف نا جماعت ءِ پاش مینڈیٹ تسنے، پنجاب آنبار تعمیر و شونداری نا آزاد کشمیر اٹی ہم بناءِ کینہ۔ آزاد کشمیر گچین کاری تے ٹی سرسہب مروک اومیتدار ساجد اقبال، طارق فضل چوہدری، شاہ غلام قادر تون اوار پریس کانفرنس آن تران کرسا رانا ثناء اللہ پارے کہ دھرنا ٹی تولوک بندغ آتے نن ایلم تکنہ، اوفتیٹی اسہ ارا درسَد نا مخصوص ایجنڈا اس مننگ کیک ولے 98 درسَد محب وطن بندغ ءُ، 25 نشست آتیا مسلم لیگ (ن) نا اومتیدار آتے سرسہبی رسینگا‘۔ تعمیر و شونداری کن آزاد کشمیر نا الس مسلم لیگ ءِ گچین کرینے۔ او دعویٰ کرے کہ پنجاب آنبار تعمیر و شونداری نا آزاد کشمیر اٹی بناءِ کینہ، آزاد کشمیر نا الس نواز شریف نا جماعت ءِ پیدوار مینڈیٹ تسنے۔ مسلم لیگ (ن) نا راہشون رانا ثناء اللہ پارے کہ ساجد اقبال ءِ تینا جماعت اٹی اوار مننگ آ بخیر کینہ‘ ساجد اقبال آزاد کشمیر نا تعمیر و شونداری ٹی اہم کڑد ادا کیک۔ رانا ثناء اللہ پارے کہ آزاد کشمیر نا لس گچین کاری تے ٹی مسلم لیگ (ن) گیشتری دوئی کرے، آزاد کشمیر کانود ساز اسمبلی ٹی ن لیگ 25 نشست دوئی کرے۔ مخصوص نشست آتا گچین کاری تیان پد ن لیگ 32 نشست دوئی کیک۔ پونچھ ڈویژن نا سلوک نشست آتیا گچین کاری آن پد ن لیگ ارا تہائی گیشتری دوئی کیک۔ دا آزاد کشمیر نا حالیت و وخت انا گرج ہم ئس۔ رانا ثناء اللہ پارے کہ مسلم لیگ (ن) آزاد کشمیر نا تعمیر و شونداری ٹی تینا کڑد ءِ ادا کیک۔ او پارے کہ ساجد اقبال عباسی ایل اے 14 آن گچین مسنے، اونا حلقہ نا الس اوڑا بھلو پت اس کرینے‘ نن ساجد عباسی آن خواست کریسن کہ ننا ٹیم انا بشخ مرے، نن خواست کریسن کہ او ننتون ہم کوپہ مرسا کاریم کے۔ ساجد اقبال تینا حلقہ نا جوانی، آزاد کشمیر نا تعمیر و شونداری کن ننا خواست ءِ امنا کرے، ساجد عباسی نن تون اوار مننگ نا فیصلہ کرینے۔ او پارے کہ ہرا بندغ آک دھرنا ٹی تولوک ءُ نن اوفتے تینا ایلم پانہ‘ اوفتیٹی اسہ ارا درسَد بندغ نا پین ایجنڈا اس مننگ کیک ولے اوفتیٹی 99 درسَد بندغ محب وطن پاکستانی ءُ۔ رانا ثناء اللہ پارے کہ راجہ فیصل و ساجد اقبال اوار مرسا آزاد کشمیر نا شونداری کن کاریم کیک‘ آزاد کشمیر اٹی امن وایمنی نا حالیت آن پد ہم کنڈہلپروک گچین کاری مس۔ آزاد کشمیر اٹی سخت انگا حالیت آتے ٹی اسمبلی جوڑ مننگ اٹی ءِ۔