مسہ دے ئی ہیلکاری ورکشاپ،بلوچستان، درسی کتاب آتا رائٹر، ایڈیٹر و جاچکار آتا لائخی تے ودفنگ آ زور

بلوچستان ٹیکسٹ بک بورڈ انا چاروکی ٹی بک رائٹرز، ایڈیٹرز و جاچکار آتا کاریمی واکداری کچ اٹ ودکی‘ درسی کتاب آتا آب ءِ پین جوان کننگ و پوسکن آ خواست اتٓتون ہمگرنچ کننگ نا باندات آ مسہ دے ئی ہیلکاری ورکشاپ نا بست و بند کننگا، ہرانا بنجائی دود آن سیکرٹری ثانوی تعلیم لعل جان جعفر، چیئرمین بلوچستان ٹیکسٹ بک بورڈ ڈاکٹر گلاب خان خلجی تران کریر۔دا وخت آ چیئرمین بلوچستان ٹیکسٹ بک بورڈ ڈاکٹر گلاب خان خلجی، سیکرٹری بلوچستان ٹیکسٹ بک بورڈ ڈاکٹر نیاز ترین، ڈائریکٹر ادارہ نصابیات نعمت اللہ خان کاکڑ، ڈائریکٹر پائٹ فاطمیہ مندوخیل تون اوار محکمہ تعلیم نا جتا جتا مضمون آتا بک رائٹرز (آتھر) و کتاب آتا جاچ ہلوک پروفیسر، اسسٹنٹ پروفیسر آتتون اوار محکمہ نا پی ایچ ڈی ڈاکٹر آک و محکمہ تعلیم نا چاہندار‘ بڑزکو کمامدار و بلوچستان ٹیکسٹ بک بورڈ انا افسر آک بشخ ہلکر۔ سیکرٹری ثانوی تعلیم لعل جان جعفر پارے کہ آب اٹنگا و بھرمی درسی کتاب آتا تیاری تعلیمی نظام نا جوانی ٹی بنداوی اہمیت تخک۔ طالب علم آتے آب اٹو‘ آسان فہم، پٹ و پولی و پوسکنوڑ خواست آتتون ہم گرنچ تعلیمی مواد نا فراوانی کن کتاب آتا آتھر (بک رائٹرز)، ایڈیٹرز و جاچکار آتا کسبی لائخی تیٹی مدام ودکی المی ءِ‘ او پارے کہ ہیلکاری ورکشاپ نا بنداوی مسخت کتاب آتا تیاری نا جتا جتا ریسہ غاتتون گنڈوک چاہندار آتا کاریمی واکداری کچ ءِ جوان کننگ، پوسکنوڑ تعلیمی اصول آتیان آگاہی فراوان کننگ و درسی کتاب آتا آب، مواد، زبان، اسلوب و تعلیمی فائدہ ءِ پین بھرمی جوڑ کننگ ءِ۔ ڈاکٹر گلاب خان خلجی پارے کہ درسی کتاب بیرہ معلومداری تا مچّی اس آخا بلکن طالب علم آتا فکری، علمی و پٹ وپولی لائخی تا جوڑ کننگ نا اہم ءُ وسیلہ اسے، ہندا سوب آن اونا تیاری اٹی آب، درستی، پٹ وپول‘ زبان و بیان و طالب علم آتا عمر و تعلیمی کہول ءِ خاص وڑاٹ مون آ تخنگ المی ءِ۔ او ہیلکاری ورکشاپ نا اڈ تننگ ناستاءِ کرسا پارے کہ دا وڑ انا ہیلکاری پروگرام تا کمک اٹ کتاب نا آتھر (رائٹرز)، ایڈیٹرز و جاچکار آتے پوسکنوڑ تدریس، نصابی گرج و بھرمی تعلیمی مواد نا تیاری نا بابت تینا لائخی تے پین جوان کننگ نا وارخواہی رسینگک۔