ننے سخت انگا حالیت آتیٹی تینا زمواری تا درک ءِ خلسا ایلوفتا کمک کن مونی بروئی ءِ،وزیراعلیٰ میر سرفراز بگٹی

وزیراعلیٰ بلوچستان میر سرفراز بگٹی سول ہسپتال کوئٹہ ٹی تیزاب گردی نا گواچی لیڈی ڈاکٹر ماہ نور ناصر نا وخت آ کمک کروک آ ورنا عبدالرازق خلجی و اونا ایلم کن سرکاری ملازمت نا پڑو کرسا اوفتا انسانیت نا جوزہ، ہمت و بہادری ءِ خراجِ تحسین پیش کرینے۔ وزیراعلیٰ بلوچستان میر سرفراز بگٹی عبدالرازق خلجی و اونا ایلم تون چیف منسٹر سیکرٹریٹ اٹی اوڑدہی کرے و مشکل وخت اٹ زہمی لیڈی ڈاکٹر نا کمک کن دمدستی گام گیج کننگ آ اونا است بڈی ءِ کرے۔ دا وخت آ وزیراعلیٰ بلوچستان پارے کہ عبدالرازق خلجی تینا جان نا پرواہ ءِ کتو انسانی ہمدردی نا درشانی ءِ کرسا زہمی لیڈی ڈاکٹر نا کمک ءِ کرے، ہندن انگا ہمتی‘ فرض شناس و انسان دوست ورناک راج کن ستا کڑزوک مریرہ‘ او پارے کہ ننے عبدالرازق خلجی کون آ ورنا تیا گمر ءِ ہرافک مشکل حالیت آتیٹی تینا زمواری نا احساس ءِ کرسا ایلوفتا کمک کن مونی بریرہ، ورنا چین ءِ ہم دا وڑا نا ہمتی و انسان دوست کڑدار آتیان سبخ ہلوئی ءِ۔ وزیراعلیٰ پارے کہ حکومت دا وڑا نا شاری تا است بڈی و اوفتا خذمت آتا امنائی ءِ کیک ہرافک انسانی جان بچفنگ و مشکل اٹی گٹ بندغ آتا کمک کن وخت آ کڑد ادا کیرہ۔ وزیراعلیٰ بلوچستان عبدالرازق خلجی و اونا ایلم کن سرکاری ملازمت نا پڑو ءِ کرسا پارے کہ اونا بہادری و انسانیت نا جوزہ راج کن اسہ مثبت ءُ درور اسے۔ دا وخت آ عبدالرازق خلجی و اونا ایلم وخت آ جوان درمان نا فراوانی، است بڈی، و سرکاری ملازمت نا پڑو آ وزیراعلیٰ بلوچستان میر سرفراز بگٹی نا منت ء ہرفیر و اوڑکن نیک انگا استخواہی تا درشانی کریر۔ او پاریر کہ وزیراعلیٰ بلوچستان نا کنڈ آن اوفتا است بڈی اوفتیکن شرف انا سوب ءِ‘ وخت اس کہ حکومت نا کنڈ آن مشکل وخت اٹی زہمی بندغ آتا کمک و وخت آ خیال کننگ نا گام گیج آک ستا کڑزرہ۔