محسن نقوی نا ضیاء لانگو آ ٹیلفون، جلہو نا مذمت ءِ کرے

بنجائی وزیر داخلہ محسن نقوی وزیر داخلہ بلوچستان ضیاء لانگو تون ٹیلفون آ حوال کرے و اونا قافلہ غا مروک جلہو نا سخت انگا لوز آتے ٹی مذمت ءِ کرسا اونا حالپڑسی ءِ کرے۔ محسن نقوی جلہو ءِ بے سہب کننگ آ بلوچستان پولیس ءِ خراجِ تحسین پیش کرے و پارے کہ اللہ تعالیٰ نا شکر ءِ کہ او ضیاء لانگو ءِ بچفے۔ بنجائی وزیر داخلہ پارے کہ بلوچستان نا الس و پولیس دہشت گردی نا برخلاف جنگ اٹی بے کچ قربانیک تسنو۔ بنجائی حکومت بلوچستان حکومت و الس تون اوار سلوک مریک و دہشت گردی نا برخلاف جنگ ءِ ایسر انجام اسکان سر کننگک۔ داوخت آ وزیرداخلہ بلوچستان ضیاء لانگو پارے کہ دہشت گردی نا برخلاف جنگ ءِ ایسر اسکان رسیفنگک۔ امن دشمن آتا پراگندہ ارادہ غاتے اواری اٹ بے سہب کینہ۔ او جلہو آن پد ہم عزم انا درشانی ءِ کرسا پارے کہ بلوچستان اٹی امن وایمنی و دہشت گردی نا چٹفنگ کن حکومت و سیکورٹی ادارہ غاک تینا جہد ءِ برجا تخرہ۔