وزیراعلیٰ بلوچستان میر سرفراز بگٹی قطبی ڈیرہ بگٹی ٹی برجا جتا جتا شونداری ڈٹ آتا جاچ

ڈیرہ بگٹی، وزیراعلیٰ بلوچستان میر سرفراز بگٹی قطبی ڈیرہ بگٹی ٹی برجا جتا جتا شونداری ڈٹ آتا جاچ ءِ ہلک و تعلقدار کمامدار آتے پارت کرے کہ ڈٹ آتیا کاریم نا رفتار ءِ پین ترند کننگے، اونا آب ءِ پک کننگے و ڈٹ آتے پک مروک آ مد انا تہٹی پورو کننگے۔ دا وخت آ ڈپٹی کمشنر ڈیرہ بگٹی و ایلو ضلعی افسر آک وزیراعلیٰ بلوچستان ءِ علاقہ ٹی برجا شونداری ڈٹ آتا پیش رفت و الس ءِ فراوان کروک بنداوی آسراتی تا بابت جم بریفنگ تسر۔ وزیراعلیٰ بلوچستان چوری و غریب چناتے پوسکن آ دور انا خواست آتا رداٹ بڑزکو کہولی تعلیم نا فراوانی کن تفنگوک تینا وڑ انا جتا انگا تعلیمی ادارہ نا ماڑی نا ہم دورہ ءِ کرے۔ دا ڈٹ نا رداٹ بلوچستان نا جتا جتا ضلع غاتیان تعلقدار سد آ حقدار چناک آب اٹو تعلیم دوئی کننگ کیرہ۔ میر سرفراز بگٹی پارے کہ تعلیم راج انا شونداری و ورنا چین نا روشنا آخبت نا بنداو ءِ‘ حکومت بلوچستان حقدار و محروم تپہ غاتا چناتے آب اٹو تعلیم نا وارخواہی فراوان کننگ کن عملی گام گیج کننگ اٹی ءِ۔ وزیراعلیٰ اسپورٹس گراؤنڈ نا ہم دورہ ءِ کرے و پارے کہ ورناتے گوازی تا پڑ‘ جانجوڑ چاگڑد و مثبت سرجز آتا وارخواہی فراوان کننگ حکومت نا اولیت آتیٹی اوار ءِ۔ قطبی ڈیرہ بگٹی ٹی اسپورٹس گراؤنڈ جوڑ کننگ آن علاقہ نا ورناتے گوازی تا جوان آسراتیک دوئی مریرہ و بین الاضلاعی گوازی تا گوتا اڈ تننگ نا کمک اٹ ورناتے تینا لائخی تا درشانی نا وارخواہی ہم دوئی مریک‘ او پارے کہ جانجوڑی نا بشخ اٹی الس ءِ جوان وآب اٹو آسراتی تا فراوانی کن صوبائی حکومت تینا کل دوئی وسیلہ غاتے کاریم اٹ اتنگ اٹی ءِ و مُر انگا علاقہ غاتیٹی بنداوی آسراتی تا فراوانی حکومت نا اولیت آتا اہم آ بشخ اسے۔ میر سرفراز بگٹی پیدوار کرے کہ شونداری ڈٹ آتیٹی ہیبدار کاریم ہچ ءُ وڑ اسے ٹی سگنگ مفک، حکومت ہیبدار تعمیراتی کاریم نا برخلاف بھرمی کارروائی کرینے و آخبت اٹی ہم آب سودا بازی کروک آتا برخلاف سخت کارروائی کننگک۔ او پارے کہ ساڑی حکومت مچ آ بلوچستان اٹی ریکارڈ شونداری ڈٹ بنا و پورو کرینے، ہرافتا بنداوی مسخت الس ءِ اوفتا درگہ غا بنداوی آسراتی تا فراوانی، پسماندگی نا چٹفنگ و شونداری بھرم آتے ہر علاقہ اسکان رسیفنگ ءِ۔