قطر اٹی امریکی فوجی اڈہ غا جلہو اٹی بشخ ہلوک 3 ایرانی پائلٹ قطری فوج انا بندی ءُ، ایران
Get real time updates directly on you device, subscribe now.
تہران، ایران اولیکو وار السی کہول آ دا ہیت ءِ پک ءِ کرینے کہ 2 مارچ آ قطر اٹی امریکی فوجی اڈہ غا جلہو آن پد گم مروک ایرانی فضائیہ نا 3 پائلٹ ءِ قطری فوج دزگیر کرینے۔ ایرانی حوالکاری ادارہ نا رِد اٹ ایرانی فوج انا اسہ عہدیدار اسے انٹرنیشنل کمیٹی آف ریڈ کراس (آئی سی آر سی) آن خواست کرینے کہ او ایرانی پائلٹ آتا حالیت نا جاست پاست ءِ کے و اوفتا یلہ کننگ کن بھرمی گام گیج کے۔ حوالکاری ادارہ نا رِد اٹ ایران نا سلہہ بند واک آتا جنرل اسٹاف نا گم مروک بندغ آتا پٹ و پول کن جوڑ مروک آ کمیٹی نا کمانڈر بریگیڈیئر جنرل محمد باقرزادہ انٹرنیشنل کمیٹی آف ریڈ کراس نا صدر مرجانا اسپولیارک ایگر نا پن آ اسہ کاغد اسے ٹی گم مروک ایرانی پائلٹ آتا بابت گڑتی نا درشانی ءِ کرے۔ بریگیڈیئر جنرل محمد باقرزادہ نا رِد اٹ 2 مارچ 2026ء آ ایرانی فضائیہ نا اِرا ایس یو 24 جنگی بمبار بالی جہاز ایران آ مروک جلہو آتا ورندی ٹی قطر اٹی اسہ امریکی فوجی اڈہ اسے نا کنڈ آ راہی مسوسر۔ اونا رِد اٹ ہڑتوم آ بالی جہاز آک سرسہبی اٹ تینا مشن ءِ پورو کریر، ولے پدی بننگ نا وخت آ اوفتے دشمن نا فضائی دفاعی نظام شست کرے، ہرانا سوب آن بالی جہاز آتا کاندہ غاتے ءِ ایجیکٹ کروئی تما۔