آئین پاکستان نا دنگ اٹی مذاکرات کروک آتیکن درگہ غاک ملوک ءُ، وزیراعلیٰ بلوچستان میر سرفراز بگٹی

وزیراعلیٰ بلوچستان میر سرفراز بگٹی پارینے کہ پاکستان 79 سال انا سفر اٹی زیرو آن بنا کرسا دنیا ٹی تینا نمان ءُ ہند اس جوڑ کرے، اینو پاکستان اسہ ایٹمی طاقت اسے و دنیا پاکستان نا کنڈ آ ہُننگ اٹی ءِ۔ پاکستان تون دفاعی معاہدہ غاک اونا ودوک آ جہانی ہند و اہمیت نا درشانی ءُ۔ دا سرسہبی تیا صدر مملکت آصف علی زرداری، وزیراعظم محمد شہباز شریف و فیلڈ مارشل سید عاصم منیر ءِ خراجِ عقیدت پیش کینہ، اوفتا کماشی ٹی پاکستان شونداری نا مزل آتے خلنگ اٹی ءِ‘ یومِ آزادی نا وخت آ بلوچستان اسمبلی نا چمنی ٹی اڈ ہلوک دود آن تران کرسا وزیراعلیٰ پارے کہ بلوچستان اٹ حالیت آک بدل ءُ، ولے اینو مچ آ صوبہ ٹی ضلع غان ہلیس ڈویژن، خلق آن ہلیس تحصیل اسکان ہرا جوش و جوزہ اٹ جشنِ آزادی اڈتننگا او دا ہیت انا پیدوار شاہدی ءِ کہ بلوچستان نا الس پاکستان تون تینا اواری و مہر انا درشانی ءِ کننگ اٹی ءِ۔ میر سرفراز بگٹی پارے کہ ہرافک دا تکِرہ کہ بلوچستان پاکستان آن جتا مننگ اٹی ءِ یا دہشت گرد آک بیداد نا کمک اٹ پاکستان ءِ پرغنگ اٹی سرسہب مریرہ، اوفک آمخ ءُ۔ او پیدوار کرے کہ بلوچستان نا الس اینو تینا عمل اٹ دا کل منفی دعویٰ تا نفی ءِ کرے۔ وزیراعلیٰ پارے کہ ریاست و حکومت نا درگہ غاک مدام ملوک مسنو و آخبت اٹی ہم ملوک مریرہ‘ اینو یومِ آزادی نا وخت آ اسہ وار ولدا سلہ خلینہ کہ بیدادی و دہشت گردی نا کسر ءِ السا قومی دنگ اٹی پدی بریر۔ توفک نا زور آ ہچ ءُ نظریہ اس بیٹ کننگ مفک، دہشت گرد آک بلوچ قوم ءِ اسہ بے کٹیا ءُ جنگ اسے ٹی دھکہ تسنو، اوفتے دا کسر ءِ الونی مریک‘ او پارے کہ اگہ بیدادی نا کسر ءِ الیپسہ تو ریاست نا رٹ ءِ امر کہ مرے برجا تخنگک۔ دا مسخت کن حکومت بلوچستان، سیکورٹی فورس، پاک فوج‘ و بلوچستان پولیس ہچ ءُ وڑ اسے ٹی ہم اسہ گام اس پدی ہننگ کن تیار اف۔ ریاست نا واکداری کن انت کہ قربانی تروئی تما تننگک و ہرا المی آ گام گیج کروئی مس ادے کننگک۔ میر سرفراز بگٹی پارے کہ حکومت ہروڑ انا روا سیاسی عمل و مذاکرات کن مدام تیار ءِ‘ ولے ہموفتتون مذاکرات مننگ کپک ہرافک کودک آ شاری تا کُشت و خون ءِ کیرہ۔ او پارے کہ دنیا ٹی دا وڑ انا جھیڑہ غاتا ایسری نا مثال آک ساڑی ءُ، ولے اوفتیٹی مذاکرات سیاسی عمل نا بشخ جوڑ مروک واک آتتون کننگا۔ دہشت گرد ٹولی تتون کننگتو۔ وزیراعلیٰ پارے کہ بلوچستان نا ورنا تے قومی دنگ اٹی اوار کننگ وخت انا اہم ءُ گرج اسے و حکومت بلوچستان دا مسخت کن گام گیج کننگ اٹی ءِ‘ او پارے کہ ہمو وخت مُر اف ہراتم بلوچستان نا ورنا چین پورو وڑاٹ ریاست تون اوار مریک۔ دا مسخت نا بنداوی وسیلہ میرٹوکریسی ءِ‘ میرٹ نا بنداو آ وارخواہی فراوان کرسا بلوچستان ءِ مہالو آن گچین جوڑ کننگانے و آخبت اٹی ہم اودے پین گچین کننگ کن گام گیج آک برجا سلرہ۔ وزیراعلیٰ بلوچستان پولیس، پاک فوج‘ ایف سی بلوچستان و کل سویلین شہید آتے خراجِ عقیدت پیش کرسا پارے کہ شہید آتا خاہوت آتے باور کرفنہ کہ اوفتا ڈکھ مچ آ بلوچستان نا ڈکھ ءِ۔ اوفتا تیناک ہرا عظیم آ قربانی ءِ تسنو، اوفتے قیامت اسکان یات تخنگک و ریاست مدام اوفتا پاک آ دتر نا وامدار مریک۔