پاکستان دہشت گردی و دنیا نا نیام اٹ دیوال اس جوڑ ءِ،وزیر داخلہ محسن نقوی

اسلام آباد، وزیر داخلہ محسن نقوی پارینے کہ اوغانستان نا ڈغار پدریسہ پاکستان اٹی دہشت گردی کن کاریم اٹ اتنگ انگ ءِ‘ پاکستان دنیا و دہشت گردی نا نیام اٹ دیوال جوڑ مرسا سلوک ءِ‘ جہانی برادری ءِ دہشت گردی نا پورو چٹفنگ کن اوار مرسا بھرمی گام گیج کروئی مریک۔ کانود آن چَپ امیگریشن نا برخلاف زیرو ٹالرنس پالیسی تینائی کننگانے و دانا پورو چٹفنگ کن کانودی امیگریشن ءِ شون تننگ بھاز اہم ءِ۔ دا خیال آتادرشانی ءِ او وزارتِ داخلہ ٹی ناروے نا وزیر خارجہ ایسپن بارتھ ایڈے تون اوڑدہی نا وخت آ کرے‘ اوڑدہی ٹی پاک ناروے ہڑتوم آ کنڈانا تعلقداری تا شون، علاقائی حالیت و تین پہ تینی استخواہی نا باندات آ جم گپ وتران کننگا۔ اوڑدہی ٹی دہشت گردی تور‘ کانود آن چَپ امیگریشن نا توننگ، پولیس ٹریننگ و میوچل لیگل اسسٹنس تون اوار چندی بشخ آتیٹی کمکاری ءِ پین ودفنگ آ امنائی مس۔ اوغانستان نا حالیت و ہموڑے ساڑی کالعدم تنظیم آتا سرجز آتا بابت ہم گپ وتران مس۔ محسن نقوی پارے کہ پاکستان کانود آن چَپ امیگریشن نا برخلاف بھرمی گام گیج کرینے، ہرافتا سوب آن یورپ اٹی کانود آن چَپ امیگریشن اٹی 47 درسَد کمتی بسنے۔ وزیر داخلہ ناروے نا وزیر خارجہ نا دورہ پاکستان ءِ ہڑتوم آ ملک آتا تین پہ تینی تعلقداری تے پین مونی دننگ اٹی اہم ءُ مزل نا نشان اس گوندا۔ ناروے نا وزیر خارجہ امریکہ ایران چک وتاڑ اٹ کمتی اتنگ کن پاکستان نا گچین و متحرک کڑد انا ستاءِ کرے۔ او ناروے ٹی پاکستانی کمیونٹی نا متحرک کڑد انا ہم ستاءِ کرسا پارے کہ پاکستانی کمیونٹی سیاست، جانجوڑی و ایلو چندی بشخ آتیٹی اہم کڑد ادا کننگ اٹی ءِ۔ اوڑدہی ٹی ہڑتوم آ کنڈ آن پاک ناروے تعلقداری تے پین سوگو کننگ نا عزم انا دوارگی کننگا۔