مین حیردین ڈرینج اٹی سندھ انا پین دیر شاغنگ ءِ ہچ گہس منپنہ،کمشنر نصیرآباد ڈویژن

سندھ و بلوچستان نا نیام اٹی جیکب آباد نا جھیڑہ ئی سم نالہ نا ویل ءِ ایسر کننگ کن کمشنر نصیرآباد ڈویژن صلاح الدین نورزئی نا پرمان نارد اٹ بلوچستان نا بڑزکو کہولی ڈل ڈپٹی کمشنر آفس جیکب آباد نا دورہ ءِ کرے، ہراڑے ڈپٹی کمشنر جیکب آباد شہزاد احمد ساہی نا کماشی ٹی اہم ءُ دیوان اس اڈ ہلک۔ بلوچستان نا ڈل ٹی ڈپٹی کمشنر جعفرآباد خالد خان، ڈپٹی کمشنر صحبت پور فریدہ ترین، سپرنٹنڈنگ انجینئر ایریگیشن سرکل مدثر ظفر کھوسہ، اسسٹنٹ کمشنر صحبت پور سیف الدین کھوسہ، سب ڈویژنل افسران امان اللہ گاجانی، عابد علی کھوسہ، امتیاز علی کھوسہ و ایلو افسر آک بشخ اوار ئسر‘ دیوان اٹی سندھ ایریگیشن کمامدار آک جھیڑہ ئی جیکب آباد سم نالہ نا بابت جم بریفنگ تسر، وخت اس کہ ڈپٹی کمشنر جعفرآباد خالد خان، ڈپٹی کمشنر صحبت پور فریدہ ترین و سپرنٹنڈنگ انجینئر مدثر ظفر کھوسہ بلوچستان نا موقف ءِ پیش کرسا پیدوار کریر کہ 2010 و 2022 نا بھس کروک نوکاپ آن بلوچستان نا ضلع غاتے بھاز نسخان رسینگا۔ ہندا سوب آن مین حیردین ڈرینج اٹی سندھ انا پین ودکی دیر شاغنگ ہچ وڑ اٹ امنا مفک‘ او پاریر کہ گڑتی تے چٹفنگ آن بیدس بلوچستان تینا دنگ اٹی جھیڑہ ئی سم نالہ نا تفنگ نا موکل تفک، وخت اس کہ تفوئی کاریم بلوچستان نا سیم انا خڑک سرمننگ آن پد ہم سندھ کمامدار آک داسکان بلوچستان آن این او سی ہلتنو‘ ہرا بے پتی نا شاہدی ءِ‘ او مستی پاریر کہ مین حیردین ڈرینج بلوچستان نا تینا دیر انا کشنگ نا ہم وس تخپک۔ دا حالیت اٹی سندھ انا ودکی دیر بلوچستان نا ضلع غاتیکن بھلو خطر اس جوڑ مننگ کیک، وخت اس کہ سندھ کمامدار آک مہالو آن آر بی او ڈی نا ہند آ ڈرینج سسٹم نا درگہ غاتے بند کرینو۔ دیوان نا اخیر اٹ ڈپٹی کمشنر جیکب آباد شہزاد احمد ساہی باور کرفے کہ سندھ کمامدار ءِ بلوچستان نا کل گڑتی تیان معلومدار کننگک و بین الصوبائی ہیت و گپ آن پد بلوچستان نا دنگ اٹی کاریم کرفنگک‘ دا وخت اسکان جھیڑہ ئی سم نالہ نا تفوئی کاریم بند کننگک۔ جیکب آباد (خ ن)