ایجوکیشن سپورٹ پروگرام،گوادر، اسکول ایجوکیشن ہیلتھ کیئر سینٹر آن 120 مسڑ طالب علم نا ٹریننگ پورو
Get real time updates directly on you device, subscribe now.
گوادر / صوبائی حکومت نا وژن نا رِد اٹ طالب علم مار و مسڑ تے آب اٹو تعلیم تون اوار عملی و فنی چاہنداری تننگ کن محکمہ تعلیم گوادر، ایجوکیشن سپورٹ پروگرام (ESP)، یونیسف (UNICEF) و یورپی یونین نا اسیجائی کمکاری اٹ گورنمنٹ گرلز ہائی اسکول شنبے اسماعیل گوادر اٹی جوڑ اسکل ایجوکیشن ہیلتھ کیئر سنٹر اٹی مسڑ طالب علم آتا طبی و تکنیکی ہیلکاری نا اولیکو ریسہ ایسر مس‘ دا پروگرام نا رِد اٹ 120 مسڑ طالب علم آک ٹریننگ پورو کرسا پاس آؤٹ مسر وخت اس کہ ارٹمیکو ریسہ نا بنا مسنے۔ میر عبدالغفور کلمتی ٹیچنگ ہسپتال نا میڈیکل سپرنٹنڈنٹ ڈاکٹر حفیظ بلوچ پارے کہ دا پروگرام نا رِد اٹ جماعت ہفتم آن جماعت نہم اسکان نا مسڑ طالب علم آتے ہشت تُو آ تالان جامع ہیلکاری کورس کرفنگ انگ ءِ‘ ہراٹی بنائی طبی کمک (First Aid)، ایمرجنسی رسپانس، جانجوڑی و رکھ (Health & Safety)، ناجوڑ نا بنائی نگہداشت و ایلو عملی طبی چاہنداری تا باقاعدہ تعلیم تننگک۔ ہیلکاری ٹی تھوری (Theory) و عملی (Practical) ہڑتوم آ بشخ آتے بریبر اہمیت تننگانے تانکہ مسڑ طالب علم آک ہلہلہ ئی حالیت آتیٹی وخت آ، بھرمی و زموارانہ کڑد ادا کننگ نا لائخ مریر۔ پروگرام نا رِد اٹ ہشت تُو انا ہیلکاری پورو مننگ آن پد امتحان بولان یونیورسٹی آف میڈیکل اینڈ ہیلتھ سائنسز، کوئٹہ نا چاروکی ٹی ہلنگلک، وخت اس کہ سرسہب مسڑ طالب علم آتے باقاعدہ سرٹیفکیٹ جاری کننگک، ہرا اوفتا کسبی لائخی و آخبت نا تعلیمی و عملی سفر اٹی کمک ایتک۔ اولیکو ریسہ ٹی 120 مسڑ طالب علم سرسہبی اٹ تینا ہیلکاری ءِ پورو کرینو، وخت اس کہ ارٹمیکو ریسہ ٹی پوسکن آ طالب علم آتا ہیلکاری نا بنا کننگانے۔ دا گام دا ہیت انا عملی شاہدی ءِ کہ صوبائی حکومت ورنا چین ءِ پوسکنوڑ دور انا خواست آتتون ہمگرنچ کننگ، جانجوڑی نا بشخ اٹی بنداوی ہیلکاری فراوان کننگ و خود اعتمادی اٹ راج انا خذمت کن تیار کننگ نا عزم آ سلوک ءِ۔ ڈسٹرکٹ ایجوکیشن آفیسر گوادر زاہد حسین بلوچ و ایجوکیشن سپورٹ پروگرام نا پروگرام منیجر عادل نودرزئی دا وخت آ پاریر کہ تعلیمی ادارہ غاتیٹی نصابی سرجز آتتون اوار طبی و تکنیکی ہیلکاری تا فراوانی وخت انا اہم ءُ گرج اسے۔ او پاریر کہ اسکل ایجوکیشن ہیلتھ کیئر پروگرام نئے بیرہ مسڑ طالب علم آتا لائخی تیٹی ودکی کیک بلکن اوفتے ہر وڑ انا ہلہلہ ئی حالیت اسے ٹی انسانی زند آتا بچفنگ و راج انا بھرمی خذمت نا لائخ ہم جوڑ کیرہ۔