وزیراعلیٰ میر سرفراز بگٹی نا کنڈ آن،یومِ استحصالِ کشمیر نا رد اٹ بلوچستان اسمبلی ٹی اسیجائی مذمتی قرارداد منظور

وزیراعلیٰ بلوچستان میر سرفراز بگٹی یومِ استحصالِ کشمیر نا وخت آ بلوچستان صوبائی اسمبلی ٹی مقبوضہ جموں و کشمیر نا حالیت و بھارت نا 5 اگست 2019 نا تینا خود آن کروک گام گیج آتا برخلاف اسیجائی مذمتی قرارداد پیش کرے، ہرانا امنائی اٹ ایوان منظوری ءِ تس۔ قرارداد ءِ وزیراعلیٰ میر سرفراز احمد بگٹی، صوبائی وزیرک میر محمد صادق عمرانی، میر ظہور احمد بلیدی، میر شعیب نوشیروانی، فیصل خان جمالی و پارلیمانی سیکرٹری برکت علی رند انا کنڈ آن اسیجائی وڑ اٹ پیش کننگا۔ قرارداد اٹی 5 اگست 2019 آ بھارت نا کنڈ آن بھارتی آئین نا آرٹیکل 370 و 35(A) ءِ تینا خودآن منسوخ کننگ نا گام ءِ غیر آئینی، کانود آن چَپ و اقوامِ متحدہ نا قرارداد آتا خلاف ورزی گوندسا اونا سخت انگا لوز آتیٹی مذمت ءِ کننگا۔ قرارداد اٹی پاننگا کہ آرٹیکل 370 مقبوضہ جموں و کشمیر ءِ خصوصی آئینی حیثیت، تینا آئین، تینا بیرک و تہہ انا وتواجہی فراوان کریکہ وخت اس کہ آرٹیکل 35(A) ریاست نا آخبتی ہندی تے سرکاری نوکری، میرات و ہنکین نا خصوصی حق آتے تسکہ۔ داکان بیدس وزیراعلیٰ بلوچستان میر سرفراز بگٹی یومِ استحصالِ کشمیر نا وخت آ تینا خصوصی کلہو اٹی پارے کہ او تینا کنڈ آن و بلوچستان نا الس نا کنڈ آن بھارت نا کانود آن چَپ کوزہ ٹی جموں و کشمیر نا الس تون یکجہتی نا درشانی ءِ کیک۔ او پارے کہ 5 اگست 2019 آ بھارت نا کنڈ آن آرٹیکل 370 و 35 اے نا منسوخی اسہ کانود آن چَپ‘ تینا خودآن و جہانی کانود آتا برخلاف گام اس ئس، ہرا نا مسخت کشمیری الس نا شناخت، حق و تاریخی حیثیت ءِ زہمی کننگ ئس۔ وزیراعلیٰ پارے کہ گدرینگوک آ چندی دہائی تیان کشمیری الس بیدادی و انسانی حق آتا بھلا خلاف ورزی تتون مون تننگ ءِ‘ او پارے کہ کشمیری الس ءِ اوفتا تینا ڈغار آ اقلیت اٹی بدل کننگ نا کوشست آک نئے بیرہ مذمت کڑزرہ، بلکن دا اقوام متحدہ نا قرارداد و جہانی کانود آتا ہم پاش آن پاش خلاف ورزی ءِ۔ میر سرفراز بگٹی پارے کہ بلوچستان نا الس بھارت نا دا گام آتا سخت انگا لوز آتیٹی مذمت ءِ کیک و کشمیری الس نا حقِ خودارادیت نا مخ تفی ءِ کیک۔ او زور شاغا کہ کشمیر نا ویل انا اسٹ انگا انصاف اٹ و مدامگی ایسری اقوامِ متحدہ نا سلامتی کونسل نا تعلقدار قرارداد و کشمیری الس نا استخواہی تا رداٹ مننگ کیک۔ وزیراعلیٰ بلوچستان پارے کہ جہانی برادری بایدے بھارت نا کانود آن چَپ کوزہ ٹی جموں و کشمیر اٹی انسانی حق آتا خلاف ورزی تا نوٹس ءِ ہلے، کشمیری الس آ مروک بیدادی تیا ہیت کے و بھارت آ جہانی زمواری تا عملدرآمد کن زور شاغے۔ او پارے کہ حکومت بلوچستان بنجائی حکومت تون اوار یکجہتی اٹ دا خواست ءِ کیک کہ ہرا عزم و مستقل مزاجی تون پاکستان گدرینگوک آ کیہی دہائی تیان کشمیری الس نا سیاسی، سفارتی و اخلاقی مخ تفی ءِ کرسا بسنے، ہمو جوزہ اٹ دا جہد ءِ آخبت ہم برجاتخنگک، او پارے کہ پاکستان و بلوچستان نا الس تینا کشمیری ایلم و ایڑھ تے اسُل تنیا اِلیپک و اوفتا حقِ خودارادیت، آجوئی و جہد انا ہر کہول آ اخلاقی مخ تفی ءِ برجا تخک۔ وزیراعلیٰ پارے کہ یومِ استحصالِ کشمیر دا عزم انا دوارگی نا دے ءِ کہ پاکستان و بلوچستان نا الس کشمیری الس تون ہر سخت انگا ساہت اٹ سلوک ءِ و اوفتا روا انگا حق آتا دوئی کننگ اسکان تینا پبی اخلاقی و سفارتی مخ تفی ءِ برجا تخک۔