پاک ایران واپاری کچ ءِ ودفنگ کن بنجائی حکومت گام گیج کننگ اٹی ءِ،گورنر بلوچستان

کوئٹہ، گورنر بلوچستان شیخ جعفر خان مندوخیل پارینے کہ پاک ایران واپاری کچ ءِ ودفنگ کن بنجائی حکومت وس انا کچ آ گام گیج کننگ اٹی ءِ‘ ایلم ملک آتتون گچین واپاری تعلقداریک وخت و حالیت آتا اہم گرج ءِ‘ دا بابت کل ملک آتے ساڑی حالیت آتے ہروئی تمک‘ بزنس کمیونٹی ملکی زرگزران نا سوگوی ٹی اہم کڑد ادا کننگ اٹی ءِ‘ دا سوب آن ننے ہندی صنعت کاری ءِ شون ترسا بندغ آتے روزگار نا وارخواہی فراوان کننگ تون اوار ملک انا زرگزران ءِ سوگو کروئی تمک انتئے کہ پوریاگر آک ملک انا زرگزران اٹی مخ آنبار ءُ‘ دا خیال آتا درشانی ءِ او پاک ایران مشترکہ چیمبر آف کامرس اینڈ انڈسٹری نا سالانہ دیوان آن تران کرسا کرے‘ دا وخت آپاک ایران مشترکہ چیمبر آف کامرس اینڈ انڈسٹری نا پوسکن گچین مروک صدر جاوید رحیم پراچہ، سینئر نائب صدر سید علی رضا رضوی، نائب صدر میر عطاء اللہ مینگل، گروپ چیئرمین ولی محمد نورزئی، مسکوہی کابینہ باسک حاجی رفو گل بڑیچ، قاری نعیم الرحمن، ملک ندیم کاسی، اسد نورزئی، حاجی سلام، ڈاکٹر فرحت حسین، تاج محمد بڑیچ، ماسٹر نادر، چوہدری رفعت، نعیم رمضان، زالبول چیمبر نا صدر شرمین یونس، فرزانہ کریم بلوچ تون اوار ایلوفک ہم ساڑی ئسر‘ گورنر بلوچستان شیخ جعفر خان مندوخیل چیمبر نا مسکوہی عہدیدار آتا کارکڑد ناستاءِ کرسا پوسکن گچین مروک عہدیدار و باسک آتے مبارک بادی ترسا اومیت درشان کرے کہ او کاروباری برادری ءِ مون تروک چیلنج آتتون مون تننگ کن تینا لائخی تے کاریم اٹ اتسا حالیت آتے گچین جوڑ کننگ اٹی پورو وڑ اٹ کڑد ادا کیرہ۔ او پارے کہ بزنس کمیونٹی بیرہ ملک و صوبہ نا زرگزرانی شونہالی ٹی اہم کڑد ادا کننگ اف بلکہ بھلو کچ اسے ٹی بندغ آتے روزگار ہم فراوان کننگ اٹی ءِ‘ دا سوب آن بزنس کمیونٹی ءِ ہر بشخ ءِ سوگو و گچین جوڑ ترسا اودے ودفنگ اٹ تینا کڑد ءِ ادا کرسا مستی ہنوئی تمک انتئے کہ ای مدام بزنس کمیونٹی تون اوار مسونٹ‘ ہراڑے ہم کنا گرج مس ای بزنس کمیونٹی تون ساڑی مریوہ و اوفتا ویل آتا ایسری کن ہر فورم آ توار چست کرسا کیوہ‘ او پارے کہ شاہراہ تا رکھ اسہ بھلو چیلنج اسے ولے دا بابت سیاسی مذاکرات و سیکورٹی گام گیج ہڑتوم آتے گرج انا رِد اٹ کاریم اٹ اتنگک تاکہ دا حالیت آتے گچین جوڑ کننگ مرے۔