استاد راج نا ہمو معمار ہے ہراس قوم نا آخبت نا بنداو ءِ سوگو کیک، عائشہ زہری

قلات، ڈپٹی کمشنر قلات انجینئر عائشہ زہری پارینے کہ استاد راج نا ہمو معمار ہے ہراس قوم نا آخبت نا بنداو ءِ سوگو کیک۔ اسہ استاد اس بیرہ کتاب تا علم تنپک بلکہ نودربر تا شخصیت، کُرد، فکرمندی و صلاحیت آتے گچین کرسا اوفتے عملی زند کن تیار کیک۔ دا ہیت او انٹرنیشنل ٹیچر ڈے نا حوالہ اٹ ڈسٹرکٹ کونسل ہال قلات اٹی اڈ ہلوک آ پروقار تقریب آن تران کرسا کہے؛ او پارے کہ دنیا ٹی اخس بھی شونی مسنے و سائنس و ٹیکنالوجی نا میدان اٹی اخس بھی پوسکن آ ایجادات مون آ بسنو، دا کل نا پد تعلیم و استاد تا محنت نا بنداوی کڑد ہے۔ اینو نن اٹی آن ہر بندغ تینا سرسہبی نا سفر اٹی تینا استاد تا محنت و رہنمائی نا مقروض ہے۔ ڈپٹی کمشنر پارے کہ استاد تا احترام ننا تہذیب و راجی قدر تا اہم بشخ ہے۔ لمہ باوہ چنا ءِ زند ایترا،خت اس کہ استاد اودے زند گدریفنگ نا سلیقہ، شعور و علم عطا کیک۔ دا سوب آن استاد نا عزت و احترام دراصل علم و آخبت نا عزت ہے۔ ڈپٹی کمشنر انجینئر عائشہ زہری یومِ اساتذہ نا موقع غا کل استاد آتے خراجِ تحسین پیش کرسا پارے کہ استاد آک نسل تا تعمیر نا بھلا فریضہ ءِ سر انجام ترنگ اٹی ءُ و اوفتا خذمت آتے اخس بھی سستنگے کم ہے۔ تقریب اٹی اسکول تا نودربر آک استاد نا عظمت و شان و راج نا تعمیر و شونی اٹی استاد تا کڑد نا حوالہ اٹ اردو و انگریزی زبان آتیٹی تقریرک پیش کریر،خت اس کہ نودربر آک جتا زیبائی ٹیبلو بھی پیش کریر ہرافتے شرکاء بھلو سستار۔ ڈپٹی کمشنر قلات انجینئر عائشہ زہری، ڈسٹرکٹ ایجوکیشن آفیسر نثار احمد نورزئی و ڈسٹرکٹ آفیسر ایجوکیشن ثناء اللہ ثناء و ایلوک نودربر تا کنڈ آن پیش کننگوک آ پروگرام ءِ سستار و استاد آتے انٹرنیشنل ٹیچر ڈے نا مبارک بادی تسر۔ تقریب نا گڈسر اٹی ڈپٹی کمشنر انجینئر عائشہ زہری، ضلعی تعلیمی افسر آک و استاد آک انٹرنیشنل ٹیچر ڈے نا حوالہ اٹ کیک بھی کاٹیر۔