ڈسکوز پرائیویٹائزیشن نا کل ریسہ غاتے پک کروک وخت اٹی پورو کننگے ،وزیراعظم شہباز شریف

وزیراعظم محمد شہباز شریف ”ڈسکوز“ نا پرائیویٹائزیشن ٹی جہانی آب انا زرکارآتا اواری ءِ پک کننگ کن گچین و جامع سُج پام اس دوئی کننگ نا پارت کرسا پارینے کہ پرائیویٹائزیشن نا کل ریسہ غاتے پک کروک مد اٹی پک مروک قاعدہ و گچین سُج پام نا رداٹ کٹیائی وڑ اٹ پورو کننگے۔ وزیراعظم محمد شہباز شریف نا کماشی ٹی بجلی تروک کمپنی تا پرائیویٹائزیشن و پرائیویٹائزیشن کمیشن نا اصلاحاتی اولسر جاچ دیوان چارشنبے نا دے آ اڈ ہلک۔ دیوان اٹی بنجائی وزیر توانائی سردار اویس احمد خان لغاری، بنجائی وزیر اقتصادی باندات احد خان چیمہ، بنجائی وزیر انفارمیشن ٹیکنالوجی شزا فاطمہ خواجہ، وزیراعظم نا سلاہکار نجکاری محمد علی و تعلقدار سرکاری ادارہ غاتا عہدیدار آک بشخ ہلکر۔ وزیراعظم آفس نا میڈیا ونگ انا کنڈآن جاری بیان نا رداٹ دیوان آن تران کرسا وزیراعظم پارت کرے کہ بجلی بشخ وپانٹ کروک کمپنی (ڈسکوز) نا پرائیویٹائزیشن ٹی جہانی آب انا زرکارآتا اواری ءِ پک کننگ کن گچین و جامع سُج پام اس دوئی کننگے، پرائیویٹائزیشن کمیشن اٹی برجا ادارہ ئی اصلاحات و اولسرجاچ انا کاریم ءِ اسہ تُو اٹی پورو کننگے۔ وزیراعظم پرائیویٹائزیشن نا عمل اٹی زرکارآتا بشخ ہلنگ کن ملک وپیشن ملک کروک سرسہب روڈ شوز آتیا است جمی نا درشانی ءِ کرسا پارے کہ ڈسکوز نا پرائیویٹائزیشن نا کل ریسہ غاتے پک کروک وخت اٹ پک مروک قاعدہ و گچین سج پام نا رداٹ کٹیائی وڑ اٹ پورو کننگے۔ وزیراعظم پرائیویٹائزیشن کمیشن نا ہیومن ریسورس اٹی جہانی آب انا مالیاتی، کانودی و انفارمیشن ٹیکنالوجی نا چاہندارآتے اوار کننگ نا پارت کرسا پارے کہ جہانی آب انا ہیومن ریسورس و چاہندار پرائیویٹائزیشن کمیشن نا کاریم نا لائخی و ادارہ ئی زرکاری ءِ ودفنگ کن گچین گام گیج آتے پک کیک۔ او پرائیویٹائزیشن نا ریسہ غاتیٹی گچین کسبی لائخی تخوک کنسلٹنٹ نا سلاہ و پرائیویٹائزیشن نا ریسہ غاتا آسراتی کن درکار کل کانودی بست و بند و مالیاتی ریگولیشن فریم ورک نا وخت آ پورو کننگ ءِ پک کننگ نا پارت ہم کرے۔ وزیراعظم پارے کہ پرائیویٹائزیشن نا عمل اٹی صارف آتا فائدہ غاتے اولیت تننگے، پرائیویٹائزیشن ٹی اوار ادارہ غاتیٹی آخبت اٹی صارف آتا غاو تا ایسری کن جامع و گچین انتظامی پنجر ءِ پک کننگے۔ وزیراعظم ءِ حوال اٹی پاننگا کہ پرائیویٹائزیشن نا اولیکو ریسہ ٹی اوار بجلی تروک کمپنی آئیسکو، فیسکو و گیپکو ٹی زرکار آتا استخواہی کن ملک و پیشن ملک روڈ شوتے پورو کننگانے، ترکیہ، سعودی عرب و چین اٹی روڈ شوز و زرکار آتتون پرائیویٹائزیشن نا رداٹ رابطہ غاتا است بڈی نا سوب نتیجہ مونی بننگ اٹی ءِ۔ دیوان اٹی پرائیویٹائزیشن کمیشن نا کنڈآن بجلی تروک کمپنی تا اولیکو ریسہ نا پورو کننگ کن داتم اسکان کننگوک گام گیج آتیا حوال تننگا۔ داکان بیدس پرائیویٹائزیشن کمیشن نا ادارہ ئی اولسر جاچ انا رد اٹ گچین ہیومن ریسورس نا اواری آ پیشرفت آ ہم حوال تننگا۔