شہید آک ننا قوم انا گمر، ریاست نا واک ءُ‘ سرفراز بگٹی

زیارت‘ وزیراعلیٰ بلوچستان میر سرفراز بگٹی پارینے کہ شہید آک ننا قوم انا گمر، ریاست نا واک و ننا پیشانی نا بینہ ءُ۔ وطن نا امن، سلامتی و سوگوی کن جان تے ندر کروک بہادر ورتا تا قربانی تے مدام یات تخنگک۔ دا دا خیال آتا درشانی ءِ زیارت اٹی شہید آتا پدخاہوت آتیٹی کمکی چیک آتا بشخ و پانٹ نا دود آن تران کرسا کرے۔ دود اٹی صوبائی وزیر نور محمد دمڑ، انسپکٹر جنرل پولیس بلوچستان محمد طاہر خان، ایلو بڑزکو کمامدار آک، شہید آتا پدخاہوت و علاقائی سرکڑدہ غاک بشخ ہلکر۔ وزیراعلیٰ دود آن مہالو شہید آتا خاہوت آتتون اوڑدہی کرے، اوفتتون ہڑزخواہی کرے و اوفتا ڈکھ و ارمان اٹی بریبر نا شریدارمننگ نا باور کرفے۔ وزیراعلیٰ بلوچستان پارے کہ زیارت مدام خوشی تا ڈغار مسنے‘ ولے داسہ نا سانحہ مچ آ صوبہ ءِ ماتنی کرینے۔ او پارے کہ شہید آک زندہ ءُ، اللہ تعالیٰ قرآن مجید اٹی شہید آتا بڑزکو درجہ ءِ پاش کرینے، ہندا ہیت ننے سگ، حوصلہ و قربانی ہیل ایتک۔ او شہید آتا درجہ غاتا بڑزی‘ پدخاہوت کن سگ و ہمت و وطن نا امن و سوگوی کن دعا ہم کرے۔ میر سرفراز بگٹی پارے کہ دہشت گرد آک نئے بیرہ کودک آ بندغ آتے خلکر بلکہ درزن نا کچ خاہوت آتا ڈکھی وارمانی کریر ولے اوفتا لغور آ اراد ہچ گہس سرسہب مفک۔ او پارے کہ دہشت گردی نا نئے اسلام تون تعلقداری اس ارے ونئے بلوچ یا پشتون ربیدگی تتون۔ بے گناہ شاری، زالبول، چنا و مسافر آتے شست کننگ انسانیت و اسلامی تعلیمات نا اسُل چپ ءِ۔