کس ءِ غاو اس ارے تو الیکشن کمیشن آ کاہے، کشمیر اٹ دھاندلی متنے،سینیٹر رانا ثناء اللہ

وزیراعظم نا سلاہکار سیاسی باندات سینیٹر رانا ثناء اللہ پارینے کہ آزاد کشمیر گچین کاری تا ارٹمیکو ریسہ جم وڑ اٹ پرامن وڑ اٹ پورو مس۔ وخت اس کہ گچین کاری رد اٹ دھاندلی نا دوبہ غاتے مسترد کرسا پارینے کہ اگر کس اسے نا غاو ارے تو او شاہدی تے الیکشن کمیشن نا مون آ پیش کے۔ آزاد کشمیر نا مشکل انگا علاقہ غاتے ٹی بھاز آ ہند آتیا نتیجہ غاتا ہُرے مننگ فطری ءِ‘۔ لطیف اکبر نا حلقہ ٹی پیش بروک واقعہ اونا خاہوتی جھیڑہ اس ئسکہ، مشتاق شاہ نا واقعہ اِرا گروپ نا نیام اٹی ہندی جھیڑہ اس ئسکہ و جاست پاست پورو مننگ آن مست اونا کزیت ءِ خون گوندنگ جوان اف۔ بنجائی وزیر باندات کشمیر انجینئر امیر مقام و سینیٹر مرتضیٰ جاوید عباسی تون اوار پریس کانفرنس کرسا رانا ثناء اللہ پارے کہ 95 آن 96 درسَد پولنگ اسٹیشن آ پولنگ پورو مسنے وخت اس کہ وونٹ آتا حساب نا ریسہ برجاءِ‘ او پارے کہ آزاد کشمیر و مہاجر آتا نشست آتیا گچین کاریک جم وڑ اٹ پرامن مسر۔ بنجائی وزیر پارے کہ اسہ سیاسی جماعت اس پولنگ پورو مننگ آن مست دھاندلی نا دوبہ خلنگ نا بنا کریسس۔ حالانکہ گچین کاری عمل پورو مننگ و نتیجہ غاتا مون آ بننگ کن انتظار کروئی ئسکہ‘ رانا ثناء اللہ دعویٰ کرے کہ میرپور اٹی گچین کاری تا دے ہچ ءُ وڑ اسے نا دھاندلی متنے۔ او پارے کہ اولیکو ریسہ ٹی ہراتم نتیجہ غاک پیدوار الوس تو ہر گڑا جوان گوندنگ انگ ئسکہ، ولے شکست نظر بننگ آن پد دھاندلی نا غوغا بنا کننگا۔ او پارے کہ دھاندلی نا دوبہ غاک بنداوی وڑ اٹ زیات ٹرن آؤٹ نا بنداو آ خلنگ انگ ءُ، حالانکہ آزاد کشمیر نا سخت انگا علاقہ غاتے ٹی بھاز آ ہند آتیان نتیجہ غاتا سر مننگ اٹ ہُرے مننگ فطری عمل اسے۔ رانا ثناء اللہ نا رِد اٹ دا آزاد کشمیر نا تاریخ نا پرامن انگا گچین کاری ئسکہ۔ سہب آن بیگہ اسکان مخالف آتا کنڈ آن دھاندلی نا ہچ ءُ دوبہ اس مون آ بتو، ولے حساب نا بنا مننگ و نتیجہ غاتا مون آ بننگ آن پد دوبہ غاک خلنگار۔ او پارے کہ بنا ٹی 13 نشست آتیا دھاندلی نا دعویٰ کننگا، ولدا دا کچ 4 و اوکان پد بیرہ 2 نشست آ سرمس۔او پارے کہ اگہ دھاندلی نا شاہدی ارے تو اوفتے الیکشن کمیشن نا مون آ پیش کروئی مریک۔ او پارے کہ مَشی علاقہ غاتے ٹی اسہ خاہوت یا خلق اسے نا گیشتری وونٹر آتا وونٹ شاغنگ مست آن مسنے و بھاز آ خلق آتیٹی اسہ خاہوت یا برادری نا 99 درسَد اسکان وونٹ کاسٹ مننگ ہم گمان آن چَپ اف۔ا وپارے کہ 90 درسَد آن زیات ٹرن آؤٹ ءِ بیرہ دھاندلی گوندنگ راستکی تیان چَپ ءِ۔ ہرا پولنگ اسٹیشن آتیا اعتراض کننگا، ہموڑے مخالف اومیتدار آتا علاقہ غاتیٹی ہم 96 آن 99 درسَد اسکان پولنگ مس۔ رانا ثناء اللہ نا مستی پارے کہ مچ آ گچین کاری نادے بیرہ مسہ واقعہ رپورٹ مسر و ہچ ءُ پولنگ اسٹیشن اسے آ سم کاری نا ہچ ءُ واقعہ اس پیش بتو۔ بھاز ہند آتیا ترندی و چنکو پنجہ چنکو بونڈا مس۔