لمہ نا پال چنا و لمہ ہڑتوم آتا جانجوڑی کن جوان ءِ‘ گورنربلوچستان

کراچی‘ گورنر بلوچستان جعفر خان مندوخیل بریسٹ فیڈنگ نا جہانی ہفتہ نا وخت آ تینا کلہو اٹی پارینے کہ لمہ نا پال چنا و لمہ ہڑتوم آتا جانجوڑی کن بے کچ جوان ءِ و و دا چنا ءِ زند انا بنا غان اسہ دراخ جوڑ ءُ بنداو اس فراوان کیک۔ او پارے کہ لمہ غاتا ہڑفنگ ننا چناتا جانجوڑی، ردوم و روشنا آخبت اٹی اسہ اہم ءُ زرکاری اسے۔ گورنر بلوچستان پارے کہ پوسکن ودی مروک چناتا جانجوڑی و رکھ ءِ پک کننگ ساڑی حکومت نا اولیکو اولیت ءِ۔ او پارے کہ اسلام لمہ نا پال ہڑفنگ ءِ چنا نا بنداوی حق و لمہ نا اہم ءُ زمواری اس گوندک۔ گورنر جعفر خان مندوخیل بریسٹ فیڈنگ نا جہانی ہفتہ ناوخت آ سُج پام مہم اڈ تننگ آ یونیسیف و ایلو شریدار ادارہ غاتا کوشست آتا ستاءِ کرے و پارے کہ داڑان راج اٹی شعور بیدار کننگ اٹی کمک رسینگک۔ او پارے کہ جانجوڑی نا چاہندار آک چنا نا ودی مننگ آن دمدستی پد بے گرج فارمولا والا پال انا کاریم اٹ اتنگ نا حوصلہ شکنی ءِ کیرہ انتئے کہ لمہ نا پال چنا کن کل آن جوان آ کنشت ءِ ہرا اونا قوتِ مدافعت ءِ سوگو کیک۔ گورنر بلوچستان میڈیا تون تعلقدار بندغ آتیا زور شاغا کہ او لمہ نا پال کنفنگ نا فائدہ غاتا بابت جم سُج پام ودی کننگ اٹی تینا بھرمی کڑد ءِ ادا کیر تانکہ اسہ دراخ جوڑ راج اسے نا ٹہیفنگ پک مننگ کے۔