کوئٹہ: کانود آن چَپ ٹرانسپورٹ سروس آتا برخلاف اسیجائی کارروائید

کوئٹہ‘ صوبائی حکومت نا پرمان و صوبائی سیکرٹری ٹرانسپورٹ محمد حیات کاکڑ و کمشنر کوئٹہ ڈویژن شاہزیب خان کاکڑ نا پارت آ سیکرٹری ریجنل ٹرانسپورٹ اتھارٹی (آر ٹی اے) کوئٹہ ڈویژن نعمت اللہ ترین نا کماشی ٹی اسسٹنٹ کمشنر سٹی کوئٹہ امیر حمزہ و ایس پی ٹریفک سٹی میڈم شبانہ تون اوار ٹیکسی اسٹینڈ آ کانود آن چَپ، ٹوڈی کار سروس و رکشہ غاتا برخلاف اسیجائی کارروائی کننگا۔ کارروائی نا وخت آ 7 کانود آن چَپ رکشہ و بے پرمٹ 4 ٹوڈی کار گاڈی تے بند کننگا، وخت اس کہ کانود آن چَپ جوڑ کروک 2 ٹوڈی کار کمپنی تا دفتر آتے ہم سیل کننگا۔ دا وخت آ سیکرٹری آر ٹی اے نعمت اللہ ترین پارے کہ کانود آن چَپ ٹرانسپورٹ سروس، بے موکل چلنگوک آ گاڈی و کانود نا خلاف ورزی ہچ ءُ وڑ اسے ٹی سگنگ مفک او پارے کہ کل ٹوڈی کار مالک آک تینا گاڈی تے کمرشل کرفسا پرمٹ دوئی کیر۔ او پیدوار کرے کہ الس نا جان و مال انا رکھ، ٹریفک نظام نا جوانی و کانود نا بالا دستی ءِ پک کننگ کن کارروائی تے پین سخت کننگک۔ کارروائی نا وخت آ گاڈی تیٹی درملکی بندغ آتے کانود آن چَپ ہرفسا ہنوک آتا برخلاف ہم کارروائی کننگا، وخت اس کہ تعلقدار بندغ آتے کانود نا رِد اٹ دزگیر کرسا مستی کانودی کارروائی نا بناءِ کننگا۔ سیکرٹری آر ٹی اے پارے کہ کل ٹرانسپورٹر و ڈیور آک ٹرانسپورٹ کانود آ عملدرآمد کیر، نہ تو خلاف ورزی کروک آتا برخلاف بے فرق آن کارروائیک برجا سلرہ۔