وزیراعظم نا کماشی ٹی دیوان،اوگرا ٹی جوانی اتنگ نا فیصلہ، پٹرولیم سپلائی چین نا ڈیجیٹل چاروکی نا پرمان

وزیراعظم محمد شہباز شریف آئل اینڈ گیس ریگولیٹری اتھارٹی (اوگرا) ٹی جامع اصلاحات، ادارہ ئی واکداری ٹی ودکی و تیل و گیس انا بشخ اٹی شفافیت ءِ پک کننگ کن پوسکنوڑ ڈیجیٹل نظام نا دمدستی نفاذ نا پارت کرے۔ او پارینے کہ حکومت الس نا اسہ اسہ پائی نا رکھ اکن سنبرینگوک ءِ و کس ءِ الس نا استحصال، کوڑی کاری یا نظام اٹی نیام تمنگ نا موکل تننگپک۔ وزیراعظم نا کماشی ٹی اوگرا نا اصلاحات و ادارہ ئی واکداری ٹی جوانی نا بابت بڑزکو کہولی دیوان اڈ ہلک، ہراٹی تیل انا سپلائی چین، ریگولیٹری نظام نا جوانی و ادارہ نا اولسر ٹہیفنگ نا باندات آتا جاچ ءِ ہلنگا۔ دیوان آن تران کرسا وزیراعظم پارت کرے کہ ایف بی آر نا پوسکنوڑ ٹریکنگ نظام ءِ ماڈل جوڑ کرسا ملک اٹی ایندھن نا ہن و بر نا بھرمی چاروکی نا نظام پیدوار کننگے۔ او پارے کہ بندرگاہ و ریفائنری تیان پٹرول پمپ اسکان پٹرولیم مصنوعات نا سپلائی چین نا ڈیجیٹل چاروکی کن پوسکنوڑ ٹیکنالوجی و سافٹ ویئر نا کاریم اٹ اتنگ ءِ پک کننگے۔ وزیراعظم اوگرا نا اولسر ٹہیفنگ و ہر بشخ و عہدہ غا میرٹ و شفاف وڑ اٹ چاہندار آتے تعینات کننگ نا پارت کرے۔ او پارے کہ اوگرا نا واکداری ٹی ودکی کن پرائیویٹ بشخ آن جوان پن تخوک چاہندار آتا خذمت آک دوئی کننگر۔ وخت اس کہ حکومت دا مسخت کن ہر وڑ انا کسبی کمک فراوان مریک۔ دیوان اٹی وزیراعظم ءِ اوگرا نا ساڑی کارکڑد، مون تروک چیلنج و جامع اصلاحاتی پروگرام آ سرجم بریفنگ تننگا۔ پاننگا کہ اوگرا تیل انا سپلائی چین ءِ بندرگاہ غان پٹرول پمپ اسکان ڈیجیٹل نظام نا رِد اٹ مانیٹر کننگ کن اہم گام گیج کرینے۔ بریفنگ اٹی پاننگا کہ قومی مانیٹرنگ ڈیش بورڈ، ٹینکر ٹریک اینڈ ٹریس سسٹم، ڈپو ٹینک ٹیلی میٹری، راہگزر موبائل ایپ، پٹرول پمپ آتیا ڈیجیٹل سیلز انٹری سسٹم و بنجائی مانیٹرنگ سیل کون آ پوسکنوڑ نظام فعال کننگانے، ہرافتا کمک اٹ پٹرولیم مصنوعات نا ہن و بر، کوڑی و بہا نا چاروکی پک مننگ اٹی ءِ۔ دیوان ءِ پاننگا کہ جولائی 2026ء نا وخت آ ڈیٹا نا بنداو آ خاص مہم نا نتیجہ ٹی کوڑی کاری، سپلائی اٹی اڑاند و ایلو خلاف ورزی تا نشاندہی کننگا، ہرافتیا شوکاز نوٹس، وضاحت طلبی و کانودی کارروائی کننگا۔ وزیراعظم اوگرا نا اصلاحاتی پروگرام ناستاءِ کرسا پارت کرے کہ تیل و گیس انا بشخ اٹی شفافیت، بھرمی چاروکی، کوڑی کاری و ناروا کٹیا کاری نا چٹفنگ کن ڈیجیٹل نظام ءِ زُت پورو وڑ اٹ فعال کننگے۔ او پارے کہ الس ءِ ایندھن نا بے اڑاند فراوانی و جوان نہاد ہلنگ حکومت نا اولیکو اولیت ءِ۔