ریاست نا سوگوی کن سیکورٹی فورس آتا قربانیک بے کسر ہنپسہ،وزیراعلیٰ میر سرفراز بگٹی

وزیراعلیٰ بلوچستان میر سرفراز بگٹی پارینے کہ ریاست نا سوگوی کن بہادر سیکورٹی فورسز آتا ورناتا قربانیک بے کسرہنپسہ۔ اسہ منظم سازش اسے نارد اٹ ہراڑے اسہ کنڈ آ ریاست ءِ نزور کننگ کن دہشت گردی نا واقعہ غاک مون آ بریرہ ایلو کنڈآ دانا دوبہ ءِ ہم ریاست نا جند آ خلسا بے چیٹی تالان کننگ نا غوغا کننگک۔ ورناتے ہچ دو بفروک جنگ اسے نا کنڈ آ دھکہ تننگ انگ ءِ۔ بلوچستان و پاکستان ءِ نزور کننگ نا ہر سازش بے سہب کننگک، ملک ءِ بشخ و پانٹ کننگ نا استخواہی تخوک آک آمخ آتا جنت اٹی رہینگرہ، دہشت گردی نا برخلاف ریاست اسہ انچ اس ہم پدی گام خلپک۔ او سیاسی جماعت آتیا زور شاغا کہ او دہشت گردی ءِ سیاست تون گنڈپس انتئے کہ دا وخت ریاست ءِ سیاست نا آخا بلکن ریاست نا سوگوی، قومی سیوت و الس نا یکجہتی نا گرج ءِ۔ دا خیال آتا درشانی او جمعہ نا دے کوئٹہ ٹی اینٹی ٹیررسٹ فورس (ATF) ٹریننگ اسکول اٹی 20 میکو ٹریننگ کورس انا پاسنگ آؤٹ پریڈ آن تران کرسا کرے۔ دود آن انسپکٹر جنرل پولیس بلوچستان محمد طاہر خان و کمانڈنٹ اے ٹی ایف اسد خان ہم تران کرے۔ وخت اس کہ داکان مست اے ٹی ایف نا ورناک دہشت گردی تور انا کسبی ہیلکاری، جنگی ہنر و آپریشنل لائخی تا گچین درشانی ءِ کریر۔ وزیراعلیٰ بلوچستان میر سرفراز بگٹی پارے کہ بلوچستان پولیس، اے ٹی ایف، سی ٹی ڈی و اسپیشل آپریشنز ونگ دہشت گردی نا برخلاف جنگ اٹی اولیکو رد اٹ کڑد ادا کننگ اٹی ءُ و حکومت دا فورس آتے پین سوگو، پوسکنوڑ و بھرمی اسٹرائیکنگ فورس انا دروشم تننگ اٹی ءِ‘ او پارے کہ دا فورس آتے پوسکنوڑ سلہہ، ازباب، ہیلکاری و کل المی وسیلہ غاک فراوان کننگرہ تانکہ او دہشت گردی نا ناچوڑ ءِ بھرمی وڑ اٹ چٹفنگ کیر۔