داسہ ہچ ءُ رعایت اس اف، دہشت گرد آک سلہہ بٹر، یا گڑا نن اوفتے چٹفنہ،لیفٹیننٹ جنرل احمد شریف

ڈی جی آئی ایس پی آر لیفٹیننٹ جنرل احمد شریف پارینے کہ نن ہارڈ اسٹیٹ اس افن، دہشت گرد آتون مذاکرات نا ہچ ءُ گنجائشت اس اف، دہشت گرد آک سلہہ بٹر یا گڑا نن اوفتے چٹفنہ، ریاست تون وفاداری ہر شاری نا زمواری ءِ‘ پاکستان ننا اولیکو و اخریکو پجار ءِ‘ دہشت گردی بھارت و اوغانستان نا اسیجائی ایجنڈا ءِ‘ اوغان طالبان رجیم دہشت گردی ءِ کاروبار نا وڑاٹ کاریم اٹ اتنگ اٹی ءِ۔ پریس بریفنگ نا وخت آ ڈی جی آئی ایس پی آر پارے کہ وزیر داخلہ محسن نقوی نا بیان آ ہچ ءُ ہیت اس کپرہ دا اونا جند انا بیان ءِ ولے پوسکن آ صوبہ غاک بایدے جوڑ کننگر ودا باببت الس آن سلاہ ہلنگے۔ پاکستان نا سلامتی و شونہالی کن گڈ گورننس المی ءِ، ننے گورننس ءِ بدل کننگ نا گرج ءِ۔ دہشت گردی نا برخلاف کروک آپریشن تا سرجم حوال آتے پارسا او پارے کہ تدوک آ پنچ سال اٹ دہشت گردی نا چٹفنگ کن ن انٹیلی جنس بیسڈ آپریشن کننگا۔ او پارے کہ جم وڑ اٹ 40 ہزار 348 انٹیلی جنس بیسڈ آپریشن کننگار ہرافتیٹی 2 ہزار 84 دہشت گرد آتے جہنم واصل کننگا۔ بلوچستان اٹی 31 ہزار 80 و کے پی کے اٹی 7 ہزار 177 وخت اس کہ ایلو علاقہ غاتیٹی 2 ہزار 91 آپریشن کننگا۔ او پارے کہ برجا سال دا وخت اسکان دہشت گردی نا سوب آن جم وڑ اٹ 819 پاکستانی شہید مسنو، ہرافتے ٹی پاک فوج انا 303 ورنا‘ پولیس و ایلو کانود نافذ کروک ادارہ غاتا 194 کارندہ وخت اس کہ 322 لس شاری اوار ءُ۔ ڈی جی آئی ایس پی آر نا رِد اٹ دا وخت آ مچ آ ملک اٹی دہشت گردی نا 3 ہزار 145 واقعہ رپورٹ مسنو، ہرافتے ٹی 1 ہزار 971 خیبر پختونخوا، 1 ہزار 148 بلوچستان وخت اس کہ 26 واقعہ ملک انا ایلو بشخ آتیٹی مون آ بسنو۔ او دہشت گردی نا کچ ءِ تدوک آ سال اتون بیٹ ترسا پارے کہ 2025 اٹی جم وڑ اٹ 2 ہزار 597 دہشت گرد خلنگار۔ وخت اس کہ برجا سال دا وخت اسکان نیمہ وخت گدرینگ انگ آن پد 2 ہزار 84 دہشت گرد خلنگانو۔ ہرا دہشت گرد آتا برخلاف کارروائی تا ترندی ءِ پیدوار کیک۔ او پارے کہ 2026 اٹی بم دھماکہ غاتا 28 واقعہ مسنو ہرافتے ٹی گیشتری جلہو گیر اوغانی ئسر۔ ہڑدے دہ دہشت گرد خلنگ انگ ءِ۔ شہید آتا نسبت اٹ خلنگوک دہشت گرد آتا کچ 2.5 درسَد ءِ‘ او پارے کہ دا سوج روا ءِ کہ دہشت گردی نا واقعہ غاتیٹی ودکی انتئے بننگ اٹی ءِ؟ دا نا اسہ بھلو سوب اس دادے کہ سیکورٹی فورس آک دہشت گرد آتا برخلاف کارروائی و آپریشن تے ٹی ترندی ایسنو‘ او پارے کہ ہراتم دہشت گرد آتا دراست سج پام بے سہب مس تو او اوغانستان اٹی طالبان تا علاقہ غاتیان سرجز و کمک نا دنگ ءِ ودفیر۔ او پارے کہ ریاستِ پاکستان نا موقف اسل پیدوار ءِ کہ دہشت گرد آتتون داسہ ہچ ءُ رعایت اس کننگپک۔ اوفتتون ہیت وگپ نا ہچ ءُ گنجائشت اس اف، دہشت گرد آک سلہہ بٹر یا گڑا نن اوفتے خلینہ۔