ریلوائی نا پوسکنوڑی پروگرام اٹی ترک کنٹرینر آتا اواری نا خواہندار اُن،بنجائی ریلوائی وزیر

بنجائی وزیر ریلوائی محمد حنیف عباسی تینا اِرا دے ئی سرکاری دورہ ترکیہ نا وخت آ انقرہ ٹی ترک کنٹریکٹرز ایسوسی ایشن (ٹی سی اے) نا بڑزکو کمامدار آتتون اوڑدہی کرے ہراٹی پاکستان ریلوائی نا پوسکنوڑ پروگرام اٹ ترک کمپنی تا اوار مننگ نا گمان تا بارواٹی گپ وتران کننگا، داوخت آ پاک ریلوائی نا چندی ڈٹ آتیٹی زرکاری و شریداری نا چندی ماڈل آتیا سجفیر۔ ہڑتوم آ کنڈ آک پبلک پرائیویٹ پارٹنرشپ، بلڈ آپریٹ ٹرانسفر، ای پی سی و ایلو پوسکن ماڈل آتا کمک اٹ کمکاری نا گمان تا جاچ ءِ ہلکر۔ بنجائی وزیر ترک کمپنی تے پاکستان ریلوائی نا بھلا شونداری و انفراسٹرکچر نا ڈٹ آتیٹی بشخ ہلنگ نا باقاعدہ سلہ خلک۔ مذاکرات نا وخت آ ایم ایل ون نا بروک آ ریسہ غاتیٹی ترک کمپنی تا تکنیکی چاہنداری آن فائدہ ہرفنگ و ایم ایل تھری نا پوسکنوڑ کننگ اٹ ترک کنٹریکٹر آتے کن کمک و زرکاری نا وارخواہی تیا گپ وتران مس۔ داکان بیدس اسلام آباد تہران استنبول فریٹ کوریڈور نا بحالی کن انفراسٹرکچر و لاجسٹکس اٹ کمکاری نا گمان تا ہم جاچ ءِ ہلنگا ہراڑان ڈیہہ اٹی واپار و زرگزرانی رابطہ غاتے پوسکن ءُ رفتار اس رسینگ کیک۔ اوڑدہی ٹی ازبکستان اوغانستان -پاکستان ریلوائی کوریڈور اٹ ہم ترک کمپنی تا اوار مننگ نا گمان تیا گپ وتران کننگا۔ ترک کمامدار آتتون پاکستان ریلوائی نا اسٹیشن، فریٹ ٹرمینل و لاجسٹکس پارک آتیٹی ترک زرکاری نا وارخواہی تیا ہم ہیت و گپ مس، داڑتون اوار اوار ریلوائی انفراسٹرکچر تون کمرشل ڈویلپمنٹ و لاجسٹکس نا بشخ آتیٹی اسیجائی ڈٹ آتا گمان تا جاچ ءِ ہلنگا و ترک کمپنی تے پاکستان اٹ مریس مدی شریداری نا وارخواہی تیان فائدہ ہرفنگ نا سلہ خلنگا۔ اوڑدہی نا اسہ پین اہم وت اس پاکستان ریلوائی ٹی ٹیکنالوجی ٹرانسفر و ہندی کہول آ ریلوائی ازباب آتا جوڑ کننگ اٹ کمک ئس۔ مسافر کوچ، فریٹ ویگن و ریلوائی ازباب آتا ہندی جوڑ کننگ اٹ ترک ٹیکنالوجی آن فائدہ ہرفنگ آ ہیت کننگا۔ پاکستان ریلوائی نا مینوفیکچرنگ و انجینئرنگ نا لائخی تے ترک ٹیکنالوجی و آزموندہ غان پین سوگو کننگ نا عزم انا درشانی ءِ کننگا۔ بنجائی وزیر ریلوائی محمد حنیف عباسی زور شاغا کہ ترک کنٹریکٹر آتا جہانی کہول آ تا جہانی کہول آ بھلا انفراسٹرکچر ڈٹ پورو کننگ نا چاہنداری پاکستان ریلوائی کن اسہ اہم ءُ وارخواہی اسے و پاکستان ریلوائی نا پوسکنوڑ کننگ اٹ جہانی آب انا آزموندہ غاتیان فائدہ ہرفنگک۔