بھارت جموں و کشمیر نا بابت راستی تے لتاڑ کننگ کپک، دفتر خارجہ

پاکستان بھارتی وزیرِ دفاع نا پوسکن آ یان تے خار تس‘ غیر زموارانہ و راستکی تیان چَپ گوندسا سخت انگا لوز آتیٹی مسترد کرینے۔ دفتر خارجہ پارینے کہ بھارت سیاسی بیان تا کمک اٹ نئے تو جموں و کشمیر نا جہانی وڑ اٹ امنا مروک جھیڑہ ئی حیثیت ءِ بدل کننگ کیک و نئے اقوامِ متحدہ نا سلامتی کونسل نا قرارداد آتے بے اثر کننگ کیک۔ پاکستان اقوامِ متحدہ و جہانی برادری آن بھارت نا پدریسہ غیر زموارانہ وڑ و ڈول نا نوٹس ءِ ہلنگ و اوڑان جہانی زمواری تا خلاف ورزی آ پرسجو کننگ نا خواست ہم کرینے۔ ترجمان دفتر خارجہ طاہر اندرابی نا کنڈ آن جاری بیان اٹی پاننگا کہ بھارتی وزیرِ دفاع نا بیان اقوامِ متحدہ نا ایجنڈہ غا ساڑی جموں و کشمیر نا جھیڑہ تون تعلقدار راستکی تے لتاڑ کننگ نا اسہ کوشست اسے و دا ڈیہہ اتون اوار جہانی امن و سلامتی ءِ خطرہ ٹی شاغنگ نا ارادی بھارتی پالیسی نا درشانی ءِ کیک۔ دفتر خارجہ نا رِد اٹ بھارت نا پاکستان نا برخلاف بے بنداو دوبہ غاک اصل اٹ مقبوضہ جموں و کشمیر آ اونا کانود آن چَپ کوزہ کننگ‘ ڈیہہ اٹی دہشت گردی نا پاننگوک کاٹم خواجہی و تینا تہہ انا ویل آتیان جہانی چکار ءِ اسہ کنڈ کننگ نا کوشست ءُ۔