ڈپٹی کمشنر نصیرآباد وریندر لعل نا ربی کینال نا دورہ، نوکاپی حالیت آتا جم جاچ

ڈپٹی کمشنر نصیرآباد وریندر لعل چھتر فلیجی آن بروک آ نوکاپی ریلہ غاتا ربی کینال اٹی پترنگ نا حالیت نا سرجم و جاچ ءِ ہلنگ کن ربی کینال نا دورہ ءِ کرے، دا موقع آ اسسٹنٹ کمشنر ڈیرہ مراد جمالی بہادر خان کھوسہ ہم اونا ہمراہ ئس۔ دورہ نا وخت آ ڈپٹی کمشنر ءِ محکمہ غاتا افسر آتا کنڈ آن داسدری آ پِر تا نتیجہ ٹی ودی مروک آ گمانی نوکاپی حالیت، دیر انا روانی، و رکھی بست و بند آتا بابت جم بریفنگ تننگا۔ بریفنگ اٹی پاننگا کہ نوکاپی ریلہ غاتا زور ءِ کم کننگ، آبادی ءِ رکھوک تخنگ و کشاری نسخان آتیان بچنگ کن جتا جتا سُج پام آتیا عملدرآمد کننگ انگ اٹی اے۔ ڈپٹی کمشنر وریندر لعل متعلقہ کمامدار آتے پارت کرسا پارے کہ نوکاپی دیر ءِ منظم و مربوط وڑ اٹ تالان کننگے۔