کوئٹہ کینٹ روڈ اے “شہید پروفیسر ناظمہ طالب ” نا پن تننگ نا منظوری

وزیراعلیٰ بلوچستان میر سرفراز بگٹی تعلیم نا بشخ اٹی گچین خذمت و وطن کن عظیم قربانی تروک آ شہید پروفیسر ناظمہ طالب نا یات ءِ مدام زندہ تخنگ کن اسہ اہم ءُ فیصلہ اس کرینے۔ کمکار وزیراعلیٰ بلوچستان حوالکاری و سیاسی باندات شاہد رند پارے کہ وزیراعلیٰ بلوچستان نا پارت آ گورنمنٹ پوسٹ گریجویٹ گرلز کالج، کوئٹہ کینٹ انا مون نا روڈ ءِ “شہید پروفیسر ناظمہ طالب روڈ” نا پن تننگ نا منظوری تننگانے۔ دا رد اٹ پرنسپل سیکرٹری وزیراعلیٰ بلوچستان سیکرٹری لوکل گورنمنٹ ءِ باقاعدہ مراسلہ جاری کرینے تانکہ المی ٓ کانودی و انتظامی کارروائی پورو کننگ مرے۔ شاہد رند پارے کہ شہید پروفیسر ناظمہ طالب تعلیم نا بشخ اٹی نمان خذمت سر تس و تینا زمواری نا پوروی نا وخت آ عظیم قربانی تس۔ ہندن کمکار وزیراعلیٰ شاہد رند پارے کہ وزیراعلیٰ میر سرفراز بگٹی کلی ببری، ہنہ اوڑک اٹی شہید آتا خاہوت آتتون ہڑزخواہی و دعا پاتیہ ناوخت آ علاقہ نا مسن تیکن گورنمنٹ گرلز اسکول جوڑ کننگ نا پڑو کریسس، ہرا نا پوروی کن باقاعدہ انتظامی کارروائی نا بناءِ کننگانے۔ شاہد رند پارے کہ وزیراعلیٰ نا پارت آ پرنسپل سیکرٹری‘ سیکرٹری سکول ایجوکیشن آ چٹھی راہی کرسا پارت کرینے کہ پڑو آ دمدستی عملدرآمد کن سمری ءِ زُوت آن زُوت وزیراعلیٰ ءِ منظوری کن پیش کننگے۔