ترندی اٹ ودوک موسمیاتی بدلی پاکستان کن کل آن بھلا چیلنج ءِ، سینیٹر محمد اورنگزیب

بنجائی وزیر خزانہ و بنگ سینیٹر محمد اورنگزیب پارینے کہ ترندی اٹ ودوک آ آبادی و موسمیاتی بدلی پاکستان کن بھلو چیلنج ءُ، اگہ ملک انا ترندی اٹ ودوک آ آبادی و موسمیاتی بدلی کون آ بنداوی چیلنج آتا مون ءِ گچین وڑاٹ توننگتو تو ملک تینا حقی شونداری نا لائخی ءِ دوئی کننگ کپک۔ وزیر خزانہ دا ہڑتوم آ ویل آتے وجودی نوعیت نا چیلنج گوندسا پارے کہ اوفتا مون ءِ توننگ کن مدامگی پالیسی اصلاحات، ادارہ ئی ہم گرنچی و مریس مدی مالی وسیلہ المی ءِ۔ دا خیال آتا درشانی ءِ او جہانی یوم آبادی 2026 نا وخت آ اڈ ہلوک آ دود آن تران کرسا پارے۔ او پارے کہ حکومت نا کوشست آک نیشنل پاپولیشن سٹیبلائزیشن پلان آن مونی ہنسا داسہ نیشنل پاپولیشن کونسل اسکان سرمسنو ہراٹی سول و عسکری سروک، بنجائی و صوبائی حکومت آتے گچین عملدرآمد کن اسہ پلیٹ فارم اسے آ جمع کننگانے۔ او پارے کہ نن بھلو وخت اسے آن چانہ کہ ویل انت ءِ و انت اکن ءِ، اصل سوج مدام دا مسنے کہ دادے امر و دیر اس ایسر کیک۔ او پارے کہ نیشنل پاپولیشن کونسل ساف و شفاف ہدف، اہم کارکڑد نا ٹک و باقاعدہ جاچ انا کمک اٹ نتیجہ غاتے پک کیک۔ او وزارت جان جوڑی ءِ باور کرفے کہ وزارت خزانہ دا رد اٹ ہر وڑ انا کمکاری ءِ جاری تخک۔ او پارے کہ حکومت آک کم مدی اولیت آتے مون آ تخسا بجٹ جوڑ کیرہ ولے آبادی ٹی ودکی و موسمیاتی بدلی ہندن ءُ ویل ءُ ہرافتے کن مریس مدی ڈٹ بندی المی ءِ۔ او خبڑدار کرے کہ اگہ دا ہڑتوم آ وجودی چیلنج آتا مون ءِ توننگتو تو 2047ء ٹی پاکستان نا جوڑ مننگ نا 100 سال پورو مننگ اسکان ہم ملک تینا حقی لائخی ءِ دوئی کننگ کپک۔ وزیر خزانہ پارے کہ حکومت ساڑی بنجائی بجٹ اٹی خاہوتی ڈٹ بندی نا بابت اہم گام گیج کرینے ہراٹی مانع حمل دوائی تیا خلوک سیلز خراج آتا چٹفنگ و ایلو خراج اصلاحات اوار ءُ ہراڑان اوفتا نہاد آتیٹی کمتی بریک، آبادی ٹی ودکی نا رفتار ءِ کم کننگ نا کوشست آتے سوگوی ملک و کم مداٹی ہم مثبت بھرم مون آ بریک۔