ڈیہہ اٹی امن، سوگوی و شونداری کن گنج کمکاری بھاز اہم ءِ،نائب وزیراعظم سینیٹر اسحاق ڈار
پاکستان 2027 اٹی سروک دیوان نا مہمانداری کن پورو وڑ اٹ تیار ءِ، ایس سی او سیکرٹری جنرل تون اوڑدہی
Get real time updates directly on you device, subscribe now.
نائب وزیراعظم و وزیر خارجہ سینیٹر محمد اسحاق ڈار تون شنگھائی کمکار تنظیم (ایس سی او) نا سیکرٹری جنرل نورلان یرمیکبایف اوڑدہی کرے ہراٹی تنظیم نا اولیت، علاقائی کمکاری و بروک آ دیوان آتا بابت باندات آتیا سرجمی اٹ گپ وتران کننگا۔ چارشنبے نادے آ دفتر خارجہ نا رداٹ اوڑدہی نا وخت آ ہڑتوم آ سرکڑدہ غاک ایس سی او نا باسک ملک آتا نیام اٹ اقتصادی کمکاری، ٹرانسپورٹ، علاقائی رابطہ (کنکٹیویٹی) و تین پہ تینی است خواہی نا ایلو بشخ آتیٹی کمکاری ءِ پین مونی دننگ نا وڑوڈول تیا گپ وتران کریر۔ فریق آک علاقائی و جہانی حالیت آتیا ہم گپ وتران کریر و ڈیہہ اٹی امن، سوگوی و مدامگی شونداری نا مونی دننگ کن کثیرالجہتی کمکاری نا اہمیت آ زور شاغار۔ ایس سی او نا سیکرٹری جنرل تنظیم نا کمک اٹ علاقائی امن، سوگوی و کمکاری نا مونی دننگ اٹ پاکستان نا گچین کڑد انا ستاءِ کرے۔ او تنظیم نا فعالیت و گچینی ٹی پین گچینی کن تینا سلاہ تے ہم پیش کرے و نائب وزیراعظم ءِ کرغزستان نا دارالحکومت بشکیک اٹی مروک شنگھائی کمکار تنظیم نا وزرائے خارجہ کونسل نا بروک آ دیوان نا تیاری تیان معلومدار کرے۔ دا وخت آ نائب وزیراعظم سینیٹر محمد اسحاق ڈار شنگھائی کمکار تنظیم نا مسخت آتا دوئی کننگ کن پاکستان نا پکا عزم انا درشانی ءِ کرے۔ او پارے کہ پاکستان ستمبر 2026 اٹی ایس سی او نا کونسل آف ہیڈز آف اسٹیٹ نا چیئرمین شپ ءِ سنبھالنگ آن مست غٹ باسک ملک آتون خڑکی کمکاری ءِ برجا تخک۔ او دا عزم انا درشانی ءِ ہم کرے کہ پاکستان 2027 اٹی ایس سی او سروک دیوان نا مہمانداری کن پورو وڑ اٹ تیار ءِ۔