حکومت الس ءِ رکھ تننگ اٹی بے سہب‘ اللہ نور بلوچ

نیشنل پارٹی ضلع چاغی نا مسکوہی صدر و بنجائی کونسلر کامریڈ اللہ نور بلوچ تینا اسہ مذمتی بیان اسے ٹی نیشنل پارٹی نا بنجائی زالبول سیکرٹری و مسکوہی ایم پی اے یاسمین لہڑی نا باوہ پنی آ راجی و قبائلی راہشون میر نور احمد لہڑی نا برمتہ کننگ آ سخت گڑتی نا درشانی ءِ کرسا سخت انگا لوز آتیٹی مذمت کرینے وپارے کہ ساڑی حکومت ہر وڑاٹ بے سہب مسنے‘۔ اوپارے کہ شرفدار و پنی آ شخصیت نا برمتہ کننگ آن حالیت آک پین خراب مریرہ۔ او پارے کہ دا وخت آ مچ آ بلوچستان اٹی بے ایمنی و بے چیٹی تالان ءِ و ہر ضلع ٹی ہڑدے حالیت آک خراب مننگ اٹی ءُ۔ وخت اس بس آتیا جلہو تو وخت اس روڈ آک بند ءُ، اگہ حکومت آن حالیت آک کنٹرول مفننگ ءُ تو دمدستی وڑاٹ استیفہ ایتے۔ او خواست کرے کہ حکومت حاجی نور احمد لہڑی ءِ دمدستی و شرف اٹ پدی اتنگ کن گام گیج کے و برمتہ کننگ نازموار آتے کانود نا مون آ سلفنگے۔چاغی (نامہ نگار)