نیشنل پارٹی نا کنڈ آن حاجی نور احمد لہڑی نا برمتہ نا مذمت

نیشنل پارٹی بلوچستان نا صدر اسلم بلوچ، صوبائی اسمبلی نا باسک میر رحمت صالح بلوچ، کلثوم نیاز بلوچ پارٹی نا بنجائی زالبول سیکرٹری یاسمین لہڑی نا باوہ حاجی نور احمد لہڑی نا برمتہ کننگ نا مذمت ءِ کرسا پاریر کہ اودے دمدستی وڑاٹ رکھی وڑ اٹ پدی اتسا ریاست تینا رٹ ءِ برجا تخے۔ حکومت نا غیر سنجیدگی و بے چکاری نا سوب آن بلوچستان بے ایمنی نا گڑھ جوڑ مسنے ہراڑے سیاسی کارندہ غاتتون اوار ہر تپہ غان تعلقدار بندغ آتا برمتہ و بے رکھی نا سوب آن الس ذہنی وڑ اٹ فریشان ءِ۔ دا خیال آتا درشانی ءِ او چارشنبے نا دے کوئٹہ پریس کلب اٹی پریس کانفرنس نا وخت آ کریر۔ دا وخت آ صوبائی جنرل سیکرٹری چنگیز حئی بلوچ ایڈووکیٹ، صوبائی ترجمان علی احمد لانگو، حاجی عطاء محمد بنگلزئی، بنجائی جوائنٹ سیکرٹری میران بلوچ، عبدالرسول تون اوار ایلوفک ہم ساڑی ئسر۔