نزورآب کارکڑد آ ایم ایس ڈی ایچ کیو ٹیچنگ ہسپتال خضدار معطل

وزیر اعلیٰ بلوچستان نا سیاسی و میڈیا باندات کمکار شاہد رند پارینے کہ خضدار نا است ہسون کروک واقعہ غان پد ڈی ایچ کیو ٹیچنگ ہسپتال خضدار اٹی نزور طبی بست و بند، انتظامی ڈیوالئی و نزور کارکڑد نا سخت نوٹس ءِ ہلسا میڈیکل سپرنٹنڈنٹ ڈاکٹر سرمد سعید خان ءِ بلوچستان ایمپلائز ایفیشنسی اینڈ ڈسپلن ایکٹ (BEEDA) 2011 نا رِد اٹ دمدستی وڑاٹ معطل کننگانے۔ شاہد رند پارے کہ وزیراعلیٰ بلوچستان میر سرفراز بگٹی نا پارت آ الس ءِ جانجوڑی نا آب اٹ و وخت آ آسراتی تا فراوانی ءِ پک کننگ کن ہچ ءُ وڑ اسے نا ڈیوالئی یا نابودی سگنگ مفک۔ او پارے کہ السی خذمت نا ادارہ غاتیٹی پرسجوئی و شفافیت حکومت نا اولیت آتے ٹی اوار ءِ و ہرا افسر یا کارندہ تینا زمواری تیٹی ڈیوالئی کرے اونا برخلاف کانود نا رِد اٹ بے فرق کارروائی کننگک۔ او پارے کہ حکومت بلوچستان جانجوڑی نا بشخ اٹی جوانی، جوان انتظامی نظام و بھرمی چاروکی نا کمک اٹ الس ءِ طبی آسراتی تا فراوانی کن عملی گام گیج کرسا کیک۔ دا رد اٹ غٹ تعلقدار افسر آتے پارت کننگانے کہ او تینا زمواری تے پورو دیانتداری، کسبی لائخی و احساسِ زمواری تون سر ایتر۔ کمکار وزیر اعلیٰ پارے کہ حکومت الس نا جان و مال انا رکھ و بنداوی آسراتی تا فراوانی آ ہچ سمجھوتہ کپک و سرکاری ادارہ غاتا کارکڑد ءِ پین بھرمی جوڑ کننگ کن پرسجو نا عمل پدریسہ برجا سلک۔