سیم تیان ایڑتر ڈوہ تا چٹفنگ کن ٹیکنالوجی شریداری المی ءِ، بنجائی وزیر داخلہ

بنجائی وزیر داخلہ محسن نقوی پارینے کہ دُنیا داوخت آ ہرا اسیجائی سیکورٹی چیلنج آتتون مون تننگ ءِ او اسہ ملک اس اسکان افس، سیم آتیان ایڑتر ءُ، اسہ ملک اس ہم تنیا دا چیلنج آتتون مون تننگ کپک۔ اقوام متحدہ نا پولیس سروک آتا سمٹ (یو این سی او پی ایس) آن تاریخی و اہم تران کرسا او جہانی برادری آ زور شاغا کہ دہشت گردی، منظم ڈوہ و سائبر کرائم تا چٹفنگ کن جہانی کمک، تین پہ تینی پت و دمدستی معلومداری تا ہل و تس داسہ مست آن زیات المی مسنے۔ اقوام متحدہ نا صدر دفتر نیویارک اٹی اڈ ہلوک دا بڑزکو کہولی جہانی فورم اٹی مچ آ دنیا غان بروک وزیر، پولیس چیف و شرفمند شخصیت آتے بخیرکرسا وزیرداخلہ محسن نقوی بیابخیری آن پد تینا عزم انا درشانی ءِ کرے۔ او پارے کہ اینو دنیا ءِ ہرا چیلنج مون تروک ءِ، او قومی سیم تے منپسہ۔ دہشت گردی، سجفوک ڈوہ، سائبر کرائم، منشیات و انسانی اسمگلنگ تون اوار اوار منی لانڈرنگ کون آ ناچوڑ آن دنیا نا ہر ملک زہمی مننگ ءِ۔ اسہ ملک اس ہم دا خطرہ غاتیان رکھوک اف، انتئے کہ کانود نافذ کروک آ ادارہ غاتا نیام اٹ سوگو شریداری جوڑ کننگ وخت نا اہم انگا گرج ءِ۔ بنجائی وزیرداخلہ پوسکن آ دور انا خواست آتے مون آ تخسا پارے کہ ٹیکنالوجی بھاز ترندی اٹ بدل مننگ ءِ کسبی ڈوہدار آک ڈوہ انا پوسکن و پوسکن آ تکنیک آتے کاریم اٹ اتنگ ءُ۔ ننے اوفتا مقابلہ ءِ کننگ و اوفتا توننگ کن تینٹ پوسکن انگا ٹیکنالوجی ءِ تینائی کروئی مریک۔ او دا ہیت آ زور شاغا کہ ننے تینا پولیس افسر آتا کسبی لائخی تے جہانی آب انا رداٹ گچین کننگ نا گرجءِ۔ فورس آتا ہیلکاری نا نظام ءِ سوگو کرسا اوٹی پوسکنوڑ زیات آن زیات کاریم اٹ اتنگ ءِ المی جوڑ کروئی مریک۔ محسن نقوی سمٹ اٹی ساڑی جہانی سروک آتا آزموندہ غاتا ستاءِ کرسا پارے کہ دا سیشن اٹی مچ آ دنیا نا آزموندہ کار و پنی آ سیکورٹی چاہندار آک اوار مسنو۔ نمے آن ہر اسٹ نہادی علم و عملی آزموندہ تخک، ہندا سوب آن نن اسہ ایلو نا خیال و سرسہبی تیان بایدے ہیل کین و اواری اٹ کاریم کننگ نا پوسکن ءُ کسر پٹن۔ وزیر داخلہ دا وخت ءِ تننگ آ اقوام متحدہ نا پولیس ایڈوائزر فیصل شاکر نا خاص منت واری ءِ ادا کرے ہراڑان جہانی ہم منصب و سنگت آتے اسہ ایلو تون ملنگ و گپ وتران کننگ نا وارخواہی رسینگا۔ او پارے کہ اقوام متحدہ ننے ہندن ءُ یکتا پلیٹ فارم اس فراوان کیک ہرا ننے تینا ملک آتے رکھ کننگ نا اسیجائی مسخت نا رداٹ یکجا کیک۔ تینا تران نا اخیر اٹ وزیر داخلہ محسن نقوی پارے کہ دا سمٹ تینا الس نا رکھ و مچ آ دنیا ٹی امن و سلامتی ءِ سوگو کننگ نا رداٹ بھاز خاص و مزل نا نشان نا حیثیت تخک۔