ایرانی ٹارگٹ کلنگ لسٹ اٹی کنا پن کل آن بڑزا تخوک ءِ،امریکی صدر ڈونلڈ ٹرمپ

امریکی صدر ڈونلڈ ٹرمپ دعویٰ کرینے کہ او ایران نا ٹارگٹ کلنگ نا لڑ اٹی اولیکو نمبر آٹے۔ ترکیہ ٹی نیٹو سروک دیوان نا وخت آ ٹرمپ آن سوج کننگا کہ او نیٹو دیوان آن پدی ہننگ کن قطر نا کنڈ آن ٹیکی تروک پوسکن آ صدارتی بالی جہاز ءِ کاریم اٹ انتئے اتتو؟ مگہ بالی جہاز نا بدل کننگ نا فیصلہ ایران تون گنڈوک سیکورٹی گڑتی و گمانی خونی جلہو نا خلیس ءِ؟ صحافی نا سوج انا ورندی ٹی ٹرمپ پارے کہ ای قطر نا کنڈ آن ٹیکی ٹی تروک بوئنگ بالی جہاز انا کمک اٹ امریکہ غا پدی ہنپرہ‘ ہرانا اسہ سوب اس سیکورٹی گڑتیک ءُ۔ اونا جاگہ غا ای ہمو متکن آ بالی جہاز اٹی سفر کیوہ ہرا مستین اٹی ایئر فورس ون نا وڑاٹ کاریم اٹ بسنے۔ امریکی صدر پارے کہ دَرو اسہ پین لڑ اس مون آ بسنے ہراٹی کنا پن اولیکو نمبر آٹے، کنے ٹک ٹاک آ اولیکو نمبر آ مننگ بھاز دوست ءِ، ولے ٹارگٹ کلنگ نا لر اٹی ہم کنا پن کل آن مون اٹی ءِ۔ صدر ٹرمپ ایران نا پوسکن آ سرکڑدہ غاتے دھڑکو ترسا اشارہ کرے کہ اوفتے ہم مسکوہی ایرانی راہشون تا وڑ اٹ ایسر کننگک۔ ٹرمپ پارے کہ ایران نا سروک آک ئسر، اوفک داسہ افس، ولدا اوفتا جاگہ غا پین سرکڑدہ بس اوفتے ہم خلکن‘ داسہ اوفتا جاگہ غا پوسکن ءُ سرکڑدہ بسنے اوفتے ہم شاید کہ خلین و او ہم سلپس۔ہچ پیدوار اف؟ او پارے کہ مننگ کیک کہ ای سلپر انتئے کہ ایران نا ٹارگٹ کلنگ نا لڑ اٹی کنا پن اولیکو نمبر آٹے۔ ٹرمپ دا وخت آ ایران نا کنڈ آن تینا خلنگ نا سازش نا بابت پین ہچ پاتو۔ اسہ پین سوج اسے نا ورندی ٹی ٹرمپ پارے کہ اودے لگپک کہ ساڑی فوجی جلہو تیان پد ایران تون اسہ پورو ءُ جنگ اس بنا کیک‘ کنا خیال دادے کہ دا باندات بھاز زُوت ایسر مرے۔ او منہ جہاز ءِ شست کریر، ہرانا ورندی ٹی نن اوفتے سخت ءُ ورندی اس تسن۔ او پارے کہ داسہ انت کہ مس او زو چٹک و ہراڑان تیل اتون اوار کل حالیت آک پین جوان مریرہ۔