پاکستان و کرغزستان نا پارلیمانی تعلقداری تے سوگو کننگ آ امنا،صدر زرداری نا دورہ

پاکستان و کرغزستان برجا سیاسی گپ و تران ءِ برجا تخنگ و پارلیمانی تعلقداری تے پین سوگو کننگ، جانجوڑی (ہیلتھ کیئر)، فارماسیوٹیکل و میڈیکل تعلیم نا بشخ آتیٹی اسیجائی ڈٹ آتا بنا کننگ و دہشت گردی، انتہا پسندی، منشیات نا اسمگلنگ و سائبر کرائمز نا برخلاف اسیجائی سُج پام آ امنا کرینو۔ ہندن ڈرگ ریگولیٹری اتھارٹی و حلال انڈسٹری نا آب آتا جاچ ءِ ہلوک ادارہ غاتا نیام اٹی کمکاری ءِ ودفنگ نا فیصلہ کننگانے۔ صدر آصف علی زرداری و کرغزستان نا صدر سادیر جباروف نا اوڑدہی آن پد جاری مروک اسیجائی اعلامیہ نا رِد اٹ صدر آصف علی زرداری کرغزستان نا حکومت و الس نا جوان مہمانداری کننگ آ منت واری ءِ ہرفے، وخت اس کہ کرغز صدر سادیر جباروف پاکستان نا دورہ نا سلہ ءِ امنا کرے۔ جاری مروک اسیجائی اعلامیہ نا رِد اٹ صدر آصف علی زرداری 6 آن 9 جولائی 2026 اسکان کرغزستان نا سرکاری دورہ ءِ کرے ہراٹی ہڑتوم آ سرکڑدہ غاتا اوڑدہی مس۔ اوڑدہی ٹی پاک کرغز وزیر و تعلقدار ادارہ غاتے واپاری و کاروباری حال حوال آتے ودفنگ کن عملی گام گیج آتا پارت کننگا و پاک کرغز تعلقداری ٹی پدریسہ سوگوی کن ہڑتوم آ صدر آک است جمی نا درشانی ءِ کریر۔ اوڑدہی ٹی دسمبر 2025 اٹی کرغز صدر نا پاکستان نا دورہ نا وخت آ مروک معاہدہ غاتیا عملدرآمد نا ارادہ نا دوارگی کننگا۔ ہڑتوم آ ملک آتا نیام اٹی سُج پامی شریداری جوڑ کننگ نا عزم ءِ کرسا واپار، زرکاری‘ کشت وکشار‘ ٹیکسٹائل، مائننگ و حلال انڈسٹری ٹی کمکاری ءِ ودفنگ نا گرج آ زور شاغنگا۔ اوڑدہی ٹی اسیجائی ورکنگ گروپ و پاک کرغز بین الحکومتی کمیشن نا کارکڑد ءِ پین جوان کننگ نا فیصلہ کننگا۔ ہڑتوم آ ملک آتا چیمبر آف کامرس و واپاری تپہ غاتا نیام اٹی دراست حال حوال کن ہر وڑ انا کمکاری نا باور کرفنگا۔ توانائی نا بشخ اٹی کمکاری و بنجائی و سویلی ایشیا ءِ گنڈوک آ “کاسا 1000” ڈٹ انا دمدستی پورو مننگ آ زور شاغنگا۔ جانجوڑی، فارماسیوٹیکل و میڈیکل تعلیم نا بشخ آتیٹی اسیجائی ڈٹ آتا بنا کننگ آ امنا کننگا۔ ڈرگ ریگولیٹری اتھارٹی و حلال انڈسٹری نا آب انا جاچ ءِ ہلوک ادارہ غاتا نیام اٹی کمکاری ءِ ودفنگ نا فیصلہ کننگا۔ بنجائی و سویلی ایشیا نا نیام اٹی ٹرانسپورٹ حال حوال، لاجسٹکس و ٹرانزٹ معاہدہ غاتا عملی نفاذ آ زور شاغنگا۔ پاکستان نا بندرگاہ تا بھرمی کاریم اٹ اتنگ و جہانی ٹرانسپورٹ راہداری تا شون اکن اسیجائی کاریم ءِ برجا تخنگ آ امنا کننگا۔ تعلیم، سائنس، دود ربیدہ‘ سیل سوات و السی جانجوڑی نا بشخ آتیٹی السی رابطہ غاتے سوگو کننگ نا عزم کننگا و دہشت گردی، انتہا پسندی، منشیات نا اسمگلنگ و سائبر کرائمز نا برخلاف اسیجائی سُج پام آ امنا کننگا۔ بشکک