بھارت نا تینا خود آن کروک کارروائیک جہانی کانود آتیان چَپ ء ُ،وزیر دفاع خواجہ آصف

سندھ طاس معاہدہ نا بابت بھارت نا داسہ نا گام گیج آتیا پاکستان نا سیاسی و حکومتی سرکڑدہ غاک اسیجائی ورندی ترسا اوفتے جہانی کانود و معاہدہ غاتیان چَپ گوندانو۔ سرکڑدہ غاک پیدوار کرینو کہ پاکستان تینا آپی حق آتا رکھ اکن ہر کانودی، سفارتی و جہانی فورم آ بھرمی وڑاٹ توار چست کننگ ءِ برجا تخک۔ چیئرمین واپڈا پارے کہ بھارت نا دیکی دریاب آتیا پوسکن آ ڈٹ آک سویلی ایشیا نا آبی سلامتی و سُج پامی سوگوی کن خطرہ جوڑ مننگ اٹی ءُ۔ اونا رِد اٹ بھارت سندھ طاس معاہدہ ءِ تینا خود آن معطل کرسا و پاکستان تون ہائیڈرولوجیکل ڈیٹا نا رپورٹ ءِ تورسا جہانی کانود آتا پاش خلاف ورزی ءِ کرینے۔ بنجائی وزیرِ حوالکاری و شینکاری عطاء اللہ تارڑ پارینے کہ سندھ طاس معاہدہ نا معطلی آن بھارت ءِ شکی مننگ آن بیدس ہچ اس دو بتو۔ او پارے کہ معاہدہ نا رِد اٹ دیر پاکستان نا روا انگا حق ءِ و بھارت نا جندی گام گیج آتا ہچ اخلاقی یا کانودی تک جوڑ مفک۔ وزیرِ دفاع خواجہ محمد آصف پیدوار موقف تینائی کرسا پارے کہ پاکستان ہر نہاد آ سندھ طاس معاہدہ نا رکھ ءِ کیک۔ او پارے کہ بھارت نا تینا خودآن کارروائیک و زوراکی نا سُج پام سگنگ مفک، وخت اس کہ سندھ طاس معاہدہ پاکستان نا آبی‘ کنشت‘ توانائی و قومی سلامتی تون دراست گنڈوک باندات اسے۔ سینیٹر ڈاکٹر افنان اللہ خان پارے کہ پاکستان تینا روا انگا آبی حق آتا رکھ اکن پُرعزم ءِ، وخت اس کہ چناب دریاب نا بڑزکو روانی ٹی بھارت نا گمانی نیام تمنگ جہانی کانود آتا پیدوار بیدادی مریک۔ پارلیمانی سیکرٹری حوالکاری و شینکاری بیرسٹر دانیال چوہدری پارے کہ آبی رکھ پاکستان نا قومی سلامتی نا اہم ءُ تمبہ اسے و اسیجائی دریاب آتا باندات آ جندی گام گیج آتا جاگہ غا سندھ طاس معاہدہ غا پورو عملدرآمد المی ءِ۔ او پارے کہ بھارت اسیجائی آبی وسیلہ غاتیا پیدوار چاروکی نا اصول آتیان پاناد مننگ اٹی ءِ۔