روس یوکرین جنگ ءِ ہم تورِفوہ، زُو اس معاہدہ اس مننگ نا اومیت ءِ،امریکی صدر ڈونلڈ ٹرمپ
ایران ءِ جوہری سلہہ جوڑ کننگ کن الیپنہ، نیٹو آن است خراب ءِ، ارب آ ڈالر آتے انتئے خڑچ کیو؟
Get real time updates directly on you device, subscribe now.
امریکی صدر ڈونلڈ ٹرمپ پارینے کہ او مچ آ دنیا ٹی ہشت جنگ تورفینے و داسہ روس و یوکرین نا نیام اٹی برجا جنگ نا چٹفنگ کن ہم سربر کننگ اٹی ءِ‘ اودے اومیت ارے کہ ہڑتوم آ ملک آتا نیام اٹی زو معاہدہ اسے آ سر مننگک۔ انقرہ اٹی نیٹو سرکڑدہ دیوان نا وخت آ ترک صدر رجب طیب اردوان تون اوڑدہی آن پد گپ و تران کرسا ڈونلڈ ٹرمپ پارے کہ ایران ءِ ہچبر جوہری سلہہ دوئی کننگ کن الیپنہ۔ او پارے کہ ترکیہ تون واپار، دفاعی کمکاری و ایران نا ساڑی حالیت آ خوڑتی اٹ گپ و تران مریک۔ امریکی صدر ترکیہ ءِ ایف 35 طیارہ فراوان کننگ نا پارت کرسا پارے کہ ترکیہ امریکہ نا اسہ سوگو و پتدارءُ سیوتی اسے، ہندا سوب آن اودے دا باندات آ ہچ ءُ گڑتی اس اف۔ او دا ہم پارے کہ ترکیہ نا کنڈ آن روسی رکھی نظام نا ہلنگ آ ہم اودے ہچ ءُ ویل اس اف۔ ڈونلڈ ٹرمپ ترکیہ نا عسکری لائخی تا ستاءِ کرسا پارے کہ دنیا ترکیہ نا واکداری آن پورو وڑاٹ آگاہ اف، وخت اس کہ اونا تینا جوان ءُ فوج اس ساڑی ءِ۔ او صدر رجب طیب اردوان ءِ اسہ بھلو راہشون اس گوندسا پارے کہ مچ آ دنیا اونا شرف ءِ کیک و امریکہ و ترکیہ نا تعلقداری سوگو بنداو آتیاٹے۔ نیٹو نا بابت ہیت کرسا ٹرمپ پارے کہ اونا است سیوت نا کارکڑد آن خراب مسنے و اگہ دا دیوان ترکیہ ٹی متوکہ تو مننگ کریکہ کہ ای اوٹی بشخ ہلپروسٹ۔ ایلو کنڈ آ ترک صدر رجب طیب اردوان پارے کہ ترکیہ پنچ ایف 35 طیارہ ہلنگ نا ارادہ کرینے‘ وخت اس کہ ہڑتوم آ سرکڑدہ غاتا نیام اٹی دفاعی کمکاری تون اوار اہم ڈیہہ ئی و جہانی باندات آتیا ہم گپ وتران مس۔