ہنہ اوڑک اٹ امن نا دمدستی بحالی، دہشت گرد آتا چٹفنگ کن پبی گام گیج کننگک،وزیراعلیٰ بلوچستان میر سرفراز بگٹی

وزیراعلیٰ بلوچستان میر سرفراز بگٹی نا کماشی ٹی صوبہ ٹی امن و ایمنی‘ خاص وڑاٹ ہنہ اوڑک و ایب کیب نا حالیت آتا جاچ ءِ ہلنگ کن اسہ بڑزکو کہولی دیوان اس اڈ ہلک۔ دیوان اٹی صوبائی وزیر داخلہ میر ضیاء اللہ لانگو، تعلقدار وزیر، بڑزکو سول و عسکری کمامدار و کانود نافذ کروک ادارہ غاتا نمائندہ غاک بشخ ہلکر۔ دیوان اٹی امن و ایمنی نا ساڑی حالیت، دہشت گردی نا داسہ نا واقعہ و الس نا جان و مال انا رکھ اکن کروک گام گیج آتا خوڑتی اٹ جاچ ءِ ہلنگا۔ دیوان ءِ ہنہ اوڑک نا است ہسون واقعہ و جم سیکورٹی حالیت آتا بابت بریفنگ تننگا و علاقہ ٹی امن نا دمدستی بحالی و دہشت گرد آتا چٹفنگ کن کیہی اہم انگا فیصلہ غاتا منظوری ءِ تننگا۔ دیوان اٹی فیصلہ کننگا کہ ہنہ اوڑک و ایب کیب اٹی دہشت گرد و اوفتا کمکار آتا برخلاف دمدستی وڑاٹ سینیٹائزیشن آپریشن بنا کننگک تانکہ شرپسند عناصر آتا پورو چٹفنگ ءِ پک کننگ مرے۔ وزیراعلیٰ میر سرفراز بگٹی پیدوار پارت کرے کہ دہشت گردی نا زموار و اوفتا کمکار آتا برخلاف بے فرق کارروائی کننگے و دا کارروائیک دہشت گرد آتا چٹفنگ اسکان برجا تخنگرہ۔ او پیدوار کرے کہ ریاست نا رٹ آ ہچ ءُ وڑ اسے نا سمجھوتہ کننگپک۔ دیوان اٹی جنگ زدہ علاقہ ٹی امن و ایمنیءِ مستی بھرمی کننگ کن اسیجائی چیک پوسٹ ءِ دمدستی فعال کننگ نا ہم فیصلہ کننگا ہراڑے غٹ تعلقدار کانود نافذ کروک ادارہ غاک اسیجائی وڑاٹ تینا کسبی زمواری تے سر تسر تانکہ دہشت گرد آتا ہن وبر ءِ بھرمی وڑاٹ توننگ مرے و الس ءِ رکھوک ءُ چاگڑد اس فراوان کننگ مرے۔ وزیراعلیٰ بلوچستان ہنہ اوڑک نا است ہسون واقعہ ٹی شہید مروک بندغ آتا پد خاہوت آتون ہمدری و ہڑزخواہی نا درشانی ءِ کرسا پارت کرے کہ شہید آتا خاہوت و زہمی تے مالی کمک و سرکاری زرتس نا ریسہ ءِ بروک آ اِرا دے اٹی بنا کننگے تانکہ زہمی خاہوت آتا دمدستی کمک مننگ کے۔ دیوان اٹی پرامن برانز کروک شاری تا گڑتی تا ہم جاچ ءِ ہلنگا۔ وزیراعلیٰ میر سرفراز بگٹی پارے کہ پرامن برانز ہر شاری نا آئینی و جمہوری حق ءِ و حکومت برانزی تا روا انگا خواست و گڑتی تا چٹفنگ کن گام گیج کننگ اٹی ءِ۔ دا مسخت کن وزیرداخلہ میر ضیاء اللہ لانگو و صوبائی وزیر بخت محمد کاکڑ نا کماشی ٹی اسہ بڑزکو کہولی کمیٹی اس ٹہیفنگانے۔ دا کمیٹی دمدستی وڑاٹ برانزی، قبائلی سرکڑدہ، گچین مروک السی نمائندہ، سول سوسائٹی و ایلو تعلقدار اسٹیک ہولڈر آتتون رابطہ کرسا گپ و تران نا کمک اٹ ویل آتا انصاف اٹ و مدامگی ایسری کن کسر کشک۔