محکمہ تعلیم کچھی ٹی چندی کیڈر تا آسامی تے کن نوشتئی امتحان تا بنا

محکمہ تعلیم کچھی نا کنڈآن جتا جتا نان ٹیچنگ کیڈر آتا آسامی تیا بھرتی کن نوشتئی امتحان تا رد وریسہ بنا کرینے‘ ہراڑے مچ آ ضلع غان ہزار آ بے روزگار آ ورناک تینا قسمت ءِ آزمائفنگ اٹی ءُ۔ امتحانک چیئرمین ریکروٹمنٹ کمیٹی احکام الدین ساتکزئی نا چاروکی ٹی اڈ تننگ انگ ءُ‘ دا وخت آ کمیٹی نا باسک ڈی ای او کچھی بیگ محمد رئیسانی، میر عبدالنبی ساسولی، ڈپٹی کمشنر کچھی نا نمائندہ عبدالحق مستوئی و محکمہ تعلیم نا ایلو کمامدار آک ہم ساڑی ئسر۔ چیئرمین ریکروٹمنٹ کمیٹی احکام الدین ساتکزئی پارے کہ محکمہ تعلیم نا نان ٹیچنگ کیڈر نا جتا جتا آسامی تیکن ٹیسٹ انا غٹ ریسہ غاک پورو میرٹ و شفافیت اٹ پورو کننگ انگ ءُ۔ اومیتدار آتا رول نمبر سلپ آتے بنجائی درگہ غا چیک کننگ آن پد اوفتے ریسہ اٹ امتحانی ہال اٹی پترینگ انگ نا موکل تننگ انگ ءِ‘ وخت اس کہ بیرہ ہمو اومیتدار آتے ٹیسٹ و انٹرویو ٹی اوار کننگک ہرافتا سیریل نمبر محکمہ تعلیم کچھی نا جاری کروک لڑ اٹی ساڑی ءِ‘۔ او مستی پارے کہ بھرتی نا مچ آ کاریم ءِ پیدوار‘ انصافا ٹ و میرٹ آ بنداو تخنگ کن غٹ المی بست و بند آتے پک کننگانے۔ دا وخت آ امتحانی ہند آ اومیتدار آتے کن ٹینٹ، سیخا و یخ انگا دیر انا ہم خاص بست و بند کننگاسس، وخت اس کہ ڈپٹی کمشنر کچھی میر ممتاز علی کھیتران ہم امتحانی ہال انا دورہ ءِ کرسا بست وبند آتا جاچ ءِ ہلک و میرٹ نا شفافیت ءِ پک کننگ کن پارت جاری کرے۔ڈھاڈر (سمیع اللہ جلبانی بلوچ)