میٹروپولیٹن کارپوریشن نا دکان تا کرا تے امر کہ مرے تروئی تمک، کمشنر کوئٹہ ڈویژن

کمشنر کوئٹہ ڈویژن شاہزیب خان کاکڑ نا کماشی ٹی میونسپل کارپوریشن نا کنڈ آن چلیفنگوک آ دکان و کھوکاتا کرا، پد سلوک زرس و ایلو تعلقدار ویل آتا ایسری نا بابت اسہ دیوان اس اڈ ہلک ہراٹی ڈپٹی کمشنر کوئٹہ مہراللہ بادینی، ایڈیشنل کمشنر کوئٹہ ڈویژن آغا سمیع اللہ، اسسٹنٹ کمشنر کوئٹہ ریونیو کوئٹہ ڈویژن سید کلیم اللہ، انجمن تاجران نا صدر رحیم کاکڑ تون اوار میٹروپولیٹن کارپوریشن نا افسر آک بشخ ہلکر۔ دیوان اٹی میٹروپولیٹن کارپوریشن نا میرات آتتون تعلقدار پورو ریکارڈ نا جاچ ءِ ہلنگا۔ بریفنگ نا وخت آ پاننگا کہ کارپوریشن نا دوٹی ہچ مف 90 کھوکا اریر‘ہرافتے ٹی 42 کھوکا مالک آک تینا کرا و پدسلوک زر آتے جمع کرفنگ نا بناءِ کرینو وخت اس کہ بچوک آ کرایہ دار تا 2021 آن داتم اسکان نا زر آک سلوک ءُ۔ دیوان اٹی فیصلہ کننگا کہ حکومت نا کنڈ آن پک کروک کراءِ امر کہ مرے باقاعدگی اٹ تروئی تمک۔ دا وخت آ کمشنر کوئٹہ ڈویژن شاہزیب خان کاکڑ پارے کہ کرایہ دار آتے آسراتی فراوان کننگ کن سلوک زرس آتے اسہ وار آ ہلنگ نا جاگہ غا قسط آتیٹی ہلنگ نا وارخواہی تننگک تانکہ او آسانی اٹ تینا سلوک زر تے پدی تننگ کیر۔ ولے او پیدوار کرے کہ ساڑی معاہدہ نا رِد اٹ کرا تننگ المی ءِ و معاہدہ نا ٹک آتا رد اٹ سال انا 10 درسَد کرا نا ودکی ہم نافذ العمل مریک۔ کمشنر پارت کرے کہ کل دکاندار و کھوکا والاتے اسہ ہفتہ ٹی ہندن ءُ قابل عمل شیڈول اس جوڑ کروئی مریک ہرانا رِد اٹ نئے بیرہ ہر تُو آ باقاعدگی اٹ جمع کننگے بلکن سلوک زر آتا قسط ہم تننگ مرے۔ او خبڑدار کرے کہ پن کروک وخت اٹ عملدرآمد مفننگ آ تعلقدار کانود نا رِد اٹ کارروائی کننگک۔ دیوان اٹی دا باندات آ ہم شرہ مس کہ کیہی کھوکاتا مون آ کانود آن چَپ تھڑا جوڑ کرسا کاروبار کننگ انگ ءِ‘ وخت اس کہ منہ کھوکا مالک دا تھڑا غاتے ایلوفتے ترسا کرا ہم ہلیرہ۔ کمشنر دا عمل ءِ قاعدہ وضابطہ غان چَپ گوندسا تعلقدار کمامدار آتے پارت کرے کہ دا وڑانا کل کانود آن چَپ تھڑہ غاتے چٹفنگے و سرکاری میرات آتا کاریم اٹ اتنگ بیرہ پک کانود نا رد اٹ پک کننگے۔ دیوان اٹی پاننگا کہ میٹروپولیٹن کارپوریشن نا دکان و کھوکا تا کرا تا باقاعدہ ہلنگ‘ سلوک زر آتا تننگ و سرکاری میرات آتا شفاف بست وبند ءِ پک کننگ کن کل المی گام گیج آتے کننگک۔