حکومت جہانی آب انا تعلیم و جہانی کہول آ رسینگ کن گام گیج کننگ ءِ،وزیراعظم محمد شہباز شریف

وزیراعظم محمد شہباز شریف پروٹیکٹریٹ آف امیگریشن نا مچ آ نظام ءِ ڈیجیٹل کننگ و پاکستانی سفارتخانہ غاتے پیشن نا ملک روزگار نا وارخواہی تیان معلومداری تننگ کن گام گیج آتے ترند کننگ نا پارت کرسا پارینے کہ پاکستان نا ہیومن ریسورس بود تخوک ءِ، حکومت جہانی آب انا تعلیم و جہانی کہول آ رسینگ کن گام گیج کننگ ءِ۔ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف نا کماشی ٹی ورناتے روزگار تننگ نا بابت جاچ دیوان دوشنبے نادے آ اڈ ہلک۔ دیوان اٹ نائب وزیراعظم و وزیر خارجہ سینیٹر محمد اسحاق ڈار، بنجائی وزیر ڈاکٹر مصدق ملک، عطاء اللہ تارڑ، چوہدری سالک حسین، وزیر مملکت بلال اظہر کیانی، چیئرمین نیوٹیک راجا قمر الاسلام، چیئرمین وزیراعظم یوتھ پروگرام رانا مشہود احمد خاں و تعلقدار بڑزکو افسر آک بشخ ہلکر۔ دیوان آن تران کرسا وزیراعظم پیشن نا ملک پاکستانی سفارتخانہ غاتے پاکستانی ہیومن ریسورس کن روزگار نا وارخواہی تا پٹنگ اٹ ترندی اتنگ، پروٹیکٹریٹ آف امیگریشن نا مچ آ نظام ءِ ڈیجیٹل کننگ و ہیومن ریسورس وڑ اٹ ورناتے پردیسی تا وزارت، نیوٹیک و یوتھ پروگرام کسب و جتا جتا زبان آتا کورس سرٹیفیکیشنز ءِ پک کننگ نا پارت کرے۔ وزیراعظم پارے کہ پاکستان نا ہیومن ریسورس بھاز لائخ ءِ، جہانی آب انا تعلیم و جہانی کہول آ رسینگ کن وس انا کچ آ گام گیج کننگ اُن۔ او پاکستانی سفارتخانہ غاتے پیشن نا ملک دوئی روزگار نا وارخواہی تیان معلومداری و ڈیٹا تننگ کن گام گیج آتے ترند کننگ نا پارت کرسا پارے کہ پاکستانی سرٹیفکیشن آتے جہانی آب اتون ہم گرنچ کننگ کن کل ادارہ غاک جتا جتا ملک آتون رابطہ غاتے سوگو کیر۔ او پارے کہ ہرا ملک آتیٹی پاکستانی کسب کار بندغ آتے کن روزگار نا وارخواہی دوئی ءِ، اوفتا زبان نا تعلیم وسرٹیفیکیشن ءِ پک کننگے۔ او نیوٹیک نا کنڈآن تکنیکی و فنی ہیلکاری نا ادارہ غاتا کارکڑد و کنٹری آف ڈیسٹینیشن سینٹرآتاجوڑ کننگ آ رپورٹ پیش کننگ نا ہم پارت کرے۔ وزیراعظم ءِ ہیومن ریسورس خاص وڑ اٹ ورناتے کن روزگار نا وارخواہی تا بابت سرجم حوال تننگا ہراٹی پاننگا کہ ڈیجیٹل یوتھ ہب اٹ 8 لکھ ورنا رجسٹر مسنو، پیشن نا ملک تفوئی کاریم‘ کشت وکشار، سیل و سوات، جان جوڑی، ٹرانسپورٹ، بائیو ٹیکنالوجی، مینوفیکچرنگ، انفارمیشن ٹیکنالوجی، انجینئرنگ، نرسنگ، دوائی جوڑ کننگ، کنوئی آ گڑاتا جوڑ کننگ و شپ بلڈنگ نا بشخ آتیٹی روزگار نا وارخواہی ساڑی ءِ۔ حوال نا رداٹ دا بشخ آتیٹی پاکستانی تے روزگار تننگ کن ہیلکاری پروگرام برجاءِ، پاکستانی سفارتخانہ چندی ملک آتیٹی دوئی روزگار نا وارخواہی و اوفتے کن لائخی ڈیجیٹل یوتھ حب پورٹل آ فراوان کیک۔