امریکہ ءِ آبنائے ہرمز اٹی نیام تمنگ نا موکل تفنہ، باقر قالیباف

ایرانی پارلیمنٹ نا اسپیکر باقر قالیباف پارینـے کہ امریکہ ءِ آبنائے ہرمز اٹی نیام تمنگ نا موکل تفـنہ۔ ایرانی پارلیمنٹ نا اسپیکر باقر قالیباف تون چینی پیپلز کانگریس نا نائب صدر نا اوڑدہی مس ہراٹی باقر قالیباف پارے کہ چین و ایران نا نیام اٹ سیاسی و زرگزرانی کمک نا ستا ءِ کینہ و ہڑتوم آ ملک آتـا نیام اٹ سُج پامی حال حوال تـے پین ودفو۔ باقر قالیباف پارے کہ ایران و چین نا سوگو آ تعلقداری دنیا ٹی چک و تاڑ (کشیدگی) ءِ کم کننگ اٹی بھرمی مرو، چین اسہ ہندن ءُ ملک اسے ہرا مشکل آ وخت اٹی نن تون سلیسـنے۔ اونا پاننگ ئس کہ آبنائے ہرمز اٹی چینی جہاز آتـا ہن وبر نا بابت ویل آتـے ایسر کرینـون ولے امریکہ ءِ آبنائے ہرمز اٹی مداخلت نا موکل تفـنہ۔ اونا مستی پاننگ ئس کہ اسرائیل امریکہ تون مروک آ معاہدہ غاتـے بھس کننگ نا کوشست کیک، ڈیہہ ٹی ایران نا دفاعی واک اسرائیل ءِ جنگ دوارہ بنا کننگ آن تورک۔ دا موقع آ چینی نائب صدر پارے کہ چین و ایران نا دوستی بھاز متکن ءِ، ہڑتوم آ ملک آتـا تعلقداری تـے پین ودفو۔