کوئٹہ،گن پوائنٹ آ پلوک آ موٹرسائیکل پدی دوئی کننگا،نیشنل موٹروے پولیس

موٹروے پولیس کارروائی کرسا کوئٹہ ٹی گن پوائنٹ آ پلوک آ موٹرسائیکل ءِ دوئی کرے۔ ترجمان نیشنل ہائی ویز اینڈ موٹروے پولیس نا رداٹ اینو سہب انا کم و ود 09:20بجہ غا سیکٹر۔ IIIانا آفیسر ٹائیگر -3 (IDP-4693) آLOC-699 ناہند آ ہڑدے ئی نا گشت آ سلوک ئس کہ اسہ شاری اس حوال تس کہ زرس مست نادرست موٹر سائیکل سوار گن پوائنٹ آ اوڑان موٹرسائیکل ءِ پلسا بلیلی نا کنڈآ نرانے۔ حوال ملنگ تون موٹروے پولیس دمدستی وڑاٹ وائر لیس نا کمک اٹ غٹ تعلقدار کارندہ غاتے الرٹ کرے و کنٹرول روم آن کلہو جاری کننگا، اوکان پد چندی ہند آتیا ناکہ بندی کننگا۔ DHAنا ہند آ تعینات آفیسر آک گچین سج پام تینائی کرسا دوبہ دار آتا کسر ءِ توننگ نا کوشست کریر۔ ہراتم دوبہ دار آک ہندا ہند آ رسینگار و موٹروے پولیس نا بھلو نفری ءِ خنار تو او تینا دزگیری آن بچنگ کن پلوک آ موٹرسائیکل و تینا کاریم اٹ توک آ موٹرسائیکل ہڑتوم آتے السا سڑک آن شیف نرنگ اٹ سرسہب مسر۔ موٹروے پولیس ہڑتوم آ موٹرسائیکل آتے ہرفسا ضلعی پولیس تون دمدستی رابطہ کرے۔ واقعہ نا زموار دوبہ دار آتا دزگیری کن ضلعی پولیس تون اسیجائی کارروائی برجاءِ۔ ڈی آئی جی نیشنل ہائی ویز اینڈ موٹروے پولیس ویسٹ زون، ڈاکٹر قریش خان کارروائی آ تعلقدار آفیسر آتا کسبی چاہنداری‘ جیرت و گچین کارکڑد نا ستاءِ کرسا اوفتے سفتی سند و نغد انعام تس۔ اوداعزم انا درشانی ءِ کرے کہ نیشنل ہائی ویز اینڈ موٹروے پولیس شاری تا جان ومال انا رکھ و الس نا وخت آ کمک کن مدام سنبرینگوک مریک و السی خذمت نا تینا مشن ءِ پورو زمواری، سِخت و کسبی وڑاٹ برجاتخک۔ (اے پی پی)