بلوچستان کابینہ نادیوان‘قومی شاہراہ تیا چیک پوسٹ آتے چٹفنگ نا پرمان

کوئٹہ: وزیراعلیٰ بلوچستان میر عبدالقدوس بزنجو ناکماشی ٹی اڈہلوک صوبائی کابینہ نا خصوصی دیوان اٹ صوبہ ٹی من وایمنی نا حالیت آتا جم جاچ ءِ ہلنگا‘ کابینہ سیکیورٹی چیکنگ نا پن آ سڑک آتیا جوڑ کروک چیک پوسٹ جوڑ کننگ آ ترند مرسا پارے کہ کل تعلقدار بنجائی صوبائی سکیورٹی ادارہ غاک شاہراہ تیا جوڑ کروک چیک پوسٹ آتے دمدستی چٹفنگ نا پرمان کرے و فیصلہ کننگا کہ داکان پد اسہ ادارہ اس ہم صوبائی حکومت نا موکل آن بیدس شاہراہ تیا چیک پوسٹ جوڑ کننگ کپک و چیک پوسٹ جوڑ کننگ محکمہ داخلہ نا موکل نا شڑت آ مریک‘ کابینہ ناباسک آک پاریر کہ چیک پوسٹ آ پن آ الس نا خواری ءِ اسُل امنا کپنہ و الس ءِ بے شرف مننگ کن النگپک‘ کابینہ نا دیوان اٹ دا ہیت آگڑتی درشان کننگا کہ بس و گاڈی تے ٹی سوار نیاڑی‘ چنا‘ ناجوڑ و پیر انگاتے چیک پوسٹ آتیا گھنٹہ غاتا گھنٹہ سلفنگ ہراڑان نئے اوفتا بے شرفی مریک بلکہ اوفے ذہنی وجونی خواری ہم مون تروئی تمک کابینہ نا دیوان اٹ امنائی کننگا کہ الس ءِ سکیورٹی نافراونی حکومت و ادارہ غاتا زمواری ءِ ولے داڑان لس بندغ نا حق آک بایدے زہمی مفس۔ بنجائی سکیورٹی ادارہ غاک سیم تیا ڈیوٹی کرسا ملک انا رکھ و اسمگلنگ و منشیات نا توننگ ءِ پک کیر‘ کابینہ نا دیوان اٹ پاننگا کہ کسٹم کوسٹ گارڈ پولیس و لیویز ءِ شاہراہ تیا چیک پوسٹ جوڑ کرسا مخلوق ءِ تنک کننگ نا واکداری اف و نئے سکیورٹی ناپن آ الس نا حق آتے خلنگ کن النگ مریک‘ کابینہ نادیوان اٹ دا ہیت آ زور شاغنگا کہ ہرا وڑ ایلو صوبہ غاتے ٹی شاہراہ و شار تے ٹی بنجائی سکیورٹی ادارہ غاتا چیک پوسٹ آک افس ہندا وڑ بایدے بلوچستان اٹ ہم چیک پوسٹ آک مفس‘ کابینہ نا دیوان اٹ پاننگا کہ سکیورٹی ادارہ غاک راج دشمن تا برخلاف ٹارگیٹڈ کاروائی کیرانتئے کہ شاہراہ تیا چیک پوسٹ آتا فائدہ ہچ مفک و نئے اینو اسکان اسہ دہشت گرد اس بس اسے آن دزگیر مسنے‘ کابینہ ٹی سریاب روڈ تون اوار شار انا ایلو علاقہ غاتے ٹی منشیات فروش آتا برخلاف پبی کارروائی کننگ نا فیصلہ کرسا پولیس و اے این ایف ءِ منشیات فرش آتا برخلاف دمدستی آپریشن بنا کننگ ناپرمان کننگاو دا عزم انا درشانی کننگا کہ تینا ورناتے منشیات کون آ لعنت آن ہر وڑ اٹ بچفنگک‘ دیوان اٹ دہشت گردی نا برخلاف جنگ اٹ سکیورٹی ادارہ غاتا قربانی تے خراج تحسین پیش کننگا۔ دیوان آن تران کرسا وزیراعلی پارے کہ صوبائی کابینہ صوبہ نا کل آن بھلا آئینی و کانودی فورم ءِ ہرا صوبہ و دا جاگہ ناالس نا حق آتا رکھ انا ضامن ءِ‘ نن مدام تینا الس و صوبہ نا حق و واکداری تا رکھ ءِ پک کرینن وداکان پد ہم کرسا کینہ‘ کس ءِ ہم بلوچستان نا الس نا استحصال کننگ کن الیپنہ۔

(آن لائن)